തൊട്ടില്‍പ്പാലം: കുന്നുമ്മല്‍ ഉപജില്ലയിലെ വിദ്യാലയങ്ങളില്‍ തുടര്‍ച്ചയായി അഞ്ചാം വര്‍ഷവും ഒന്നാം ക്ലാസ് അഡ്മിഷനില്‍ ദേവര്‍കോവില്‍ യു.പി ഒന്നാം സ്ഥാനത്ത്. അധ്യായന വര്‍ഷത്തെ ആറ് പ്രവൃത്തി ദിനത്തിലെ കണക്കനുസരിച്ച് 148 വിദ്യാര്‍ഥികളാണ് ഒന്നാം ക്ലാസില്‍ പ്രവേശനം നേടിയത്.
    കോഴിക്കോട് ജില്ലയില്‍ തന്നെ അഡ്മിഷന്‍ വര്‍ധിക്കുന്ന ചുരുക്കം വിദ്യാലയങ്ങളില്‍ ഒന്നുകൂടിയാണ് ദേവര്‍കോവില്‍ യു.പി. അതേസമയം പഠന പാഠ്യേതര മികവില്‍ ശ്രദ്ധേയമായ സ്‌കൂളിലേക്ക് സമീപ പ്രദേശത്തെ അണ്‍ എയ്ഡഡ് ഇംഗ്ലീഷ് മീഡിയം സ്‌കൂളില്‍ നിന്നും വിദ്യാര്‍ഥികള്‍ പ്രവേശനം നേടിയെത്തിയിട്ടുണ്ട്.
    അഡ്മിഷന്‍ വര്‍ധനവ് പരിഗണിച്ച് കഴിഞ്ഞ വര്‍ഷത്തെ എസ്.എസ്.എ മികവ് പുരസ്‌ക്കാരം സ്‌കൂളിനാണ് ലഭിച്ചത്. വിദ്യാഭ്യാസ വകുപ്പിന്റെ മികച്ച പി.ടി.എ അവാര്‍ഡും നേരത്തെ ലഭിച്ചിരുന്നു. പൊതുവിദ്യാലയ ശാക്തീകരണത്തിന് വേറിട്ട മാതൃകകള്‍ തയ്യാറാക്കി മുന്നേറുന്ന വിദ്യാലയത്തെ പൊതുസമൂഹം അംഗീകരിച്ചതിന്റെ തെളിവാണ് വര്‍ഷാവര്‍ഷം അഡ്മിഷന്‍ വര്‍ധനവ് സൂചിപ്പിക്കുന്നതെന്ന് ഹെഡ്മാസ്റ്റര്‍ പി.കെ നവാസ് പറഞ്ഞു. നിലവില്‍ ഒന്നു മുതല്‍ ഏഴുവരെ ക്ലാസുകളില്‍ 1259 വിദ്യാര്‍ഥികളാണുള്ളത്.