ന്യൂഡല്‍ഹി: ആധാരങ്ങള്‍ ആധാര്‍ നമ്പറുമായി ബന്ധിപ്പിക്കണമെന്ന് ആവശ്യപ്പെട്ടു കേന്ദ്രം സംസ്ഥാനങ്ങള്‍ക്ക് അയച്ചു എന്നു പ്രചരിക്കുന്ന കത്ത് വ്യാജമെന്നു കേന്ദ്രസര്‍ക്കാര്‍. കത്തിനെതിരേ പൊലിസില്‍ പരാതി നല്‍കിയതായി പിആര്‍ബി ഡയറക്ടര്‍ ജനറല്‍ ഫ്രാങ്ക് നറോണ അറിയിച്ചു.

1950 ന് ശേഷമുള്ള വസ്തു ആധാരങ്ങളും അതാത് ഉടമസ്ഥന്റെ ആധാറുമായി ബന്ധിപ്പിക്കണമെന്നായിരുന്നു കത്തിലെ ഉള്ളടക്കം. ആധാറുമായി  ബന്ധിപ്പിക്കാത്തത് ബിനാമി ഇടപാടായി കണക്കാക്കുമെന്നും കത്തില്‍ പറയുന്നു.

ഓഗസ്റ്റ് 14നകം നടപടികള്‍ പൂര്‍ത്തീകരിക്കണം. ആധാരങ്ങളെ ആധാറിനു പുറമെ പാന്‍കാര്‍ഡുമായും ബന്ധിപ്പിക്കണമെന്നും കത്തില്‍ പറയുന്നുണ്ട്.

എല്ലാ ബാങ്ക് അക്കൗണ്ടുകള്‍ക്കും ആധാര്‍ കാര്‍ഡ് നിര്‍ബന്ധമാക്കി കേന്ദ്രസര്‍ക്കാര്‍ നേരത്തെ ഉത്തരവിറക്കിയിരുന്നു. ഡിസംബര്‍ 31 നകം എല്ലാ അക്കൗണ്ടുകളും ആധാറുമായി ബന്ധിപ്പിക്കണം.