രാജപുരം: മലയോരത്ത് വീണ്ടും പുലി ഇറങ്ങി. കോടോംബേളൂര്‍ അയറോട്ടാണ് പുലിയെ കണ്ടത്. വഞ്ചിപുരയ്ക്കല്‍ കുര്യന്റെ റബര്‍ ത്തോട്ടത്തില്‍ കഴിഞ്ഞ ദിവസമാണ് പുലിയെ കണ്ടത്.
സ്ഥിരീകരിച്ചതിനെ തുടര്‍ന്ന് വനം വകുപ്പ് അധികൃതര്‍ ജാഗ്രതയ്ക്കു നിര്‍ദേശം നല്‍കി. റബര്‍ ടാപ്പിങ് നടത്തുകയായിരുന്ന നാരായണന്‍, ബാബു എന്നിവരാണ് പുലിയെ കണ്ടത്. വിവരം നാട്ടുകാരെ അറിയിക്കുകയായിരുന്നു. ആളുകളുടെ ശബ്ദം കേട്ട പുലി വനത്തിലേക്ക് ഓടുകയായിരുന്നു.
വിവരമറിഞ്ഞ് വനം വകുപ്പ് ഉദ്യോഗസ്ഥരായ സി. പ്രഭാകരന്‍, ആര്‍. ബാബു, അനൂപ്, ജോഷി എന്നിവര്‍ സ്ഥലത്തെത്തി. നാട്ടുകാര്‍ നല്‍കിയ വിവരണത്തില്‍നിന്നു കണ്ടത് പുലി തന്നെയാണെന്ന് അവരും സ്ഥിരീകരിച്ചു. ഇതോടെ പ്രദേശവാസികള്‍ പരിഭ്രാന്തിയിലായി.
രാവിലെയും സന്ധ്യാസമയത്തുമാണ് പുലിയിറങ്ങുകയെന്നും ഈ സമയത്ത് പുറത്തിറങ്ങുമ്പോള്‍ കരുതിയിരിക്കണമെന്നും വനപാലകര്‍ അറിയിച്ചു. ഏതാനും ദിവസം മുമ്പ് വണ്ണാത്തിക്കാനം, പുഞ്ചക്കര ഭാഗങ്ങളിലും പുലിയിറങ്ങിയിരുന്നു.