കൊല്‍ക്കത്ത: നോര്‍ത്ത് ഈസ്റ്റ് യുനൈറ്റഡുമായുള്ള സൗഹൃദ മത്സരത്തിനിടെ പരുക്കേറ്റ സന്ദേശ് ജിങ്കന് സീസണ്‍ നഷ്ടമായേക്കും. ജിങ്കന്റെ പരുക്ക് കേരള ബ്ലാസ്റ്റേഴ്‌സിനും ഇന്ത്യക്കും കനത്ത തിരിച്ചടിയാകും. ആങ്കിളിനേറ്റ പരുക്കാണ് താരത്തിന് വിനയായത്. എം.ആര്‍.ഐ സ്‌കാനിങ്ങിലാണ് താരത്തിന്റെ പരുക്ക് ഗുരുതരമാണെന്ന് കണ്ടെത്തിയത്. ശസ്ത്രക്രിയ നടത്തിയാല്‍ മാത്രമേ ജിങ്കന് പൂര്‍വ സ്ഥിതിയിലെത്താന്‍ സാധിക്കൂ എന്നാണ് റിപ്പോര്‍ട്ടുകള്‍. ലോകകപ്പ് യോഗ്യതാ മത്സരത്തില്‍ ബംഗ്ലാദേശിനെ നേരിടുന്ന ഇന്ത്യന്‍ ടീമില്‍ ജിങ്കനുണ്ടാവില്ല എന്നുറപ്പായി. അനസിന്റെ പരുക്ക് കാരണം ജിങ്കനും ആദില്‍ ഖാനും ആയിരുന്നു ഇന്ത്യന്‍ പ്രതിരോധ നിരയില്‍ കളിച്ചിരുന്നത്. ജിങ്കന്‍ കൂടി പോയതോടെ ഒരു സെന്റര്‍ ബാക്ക് ഇല്ലാത്ത അവസ്ഥയിലാകും ഇന്ത്യ.