തേഞ്ഞിപ്പലം: ഗ്രാമപഞ്ചായത്തിലെ ഇരുമ്പോത്തിങ്ങല്‍ എസ്.സി കോളനിയില്‍ കുടിവെള്ളമെന്ന സ്വപ്നം പൂവണിയുന്നു.
ഏറെ നാളെത്തെ കാത്തിരിപ്പിനൊടുവില്‍ തിരൂരങ്ങാടി ബ്ലോക്ക് പഞ്ചായത്ത് അനുവദിച്ച ഇരുപത് ലക്ഷവും ഗ്രാമപഞ്ചായത്തിന്റെ പത്ത് ലക്ഷം രൂപയും വിനിയോഗിച്ചാണ് പ്രദേശത്തേക്ക് പൈപ്പ്‌ലൈന്‍ വെള്ളമെത്തിക്കുന്നത്. പ്രദേശത്തെ അന്‍പതിലേറെ കുടുംബങ്ങള്‍ക്ക് ഉപകാരപ്പെടുന്നതാണ് പദ്ധതി.
നേരത്തേ നെച്ചിനാത്ത് ഭാഗം വരെ എത്തിയിരുന്ന കുടിവെള്ള പൈപ്പ്‌ലൈന്‍ ഈയിടെയാണ് ഇരുമ്പോത്തിങ്ങല്‍ എസ്.സി കോളനിയിലേക്ക് നീട്ടിയത്.
ഇരുമ്പോത്തിങ്ങല്‍ കടവ് വരെ വെള്ളമെത്തിക്കാന്‍ ഇനിയും കാത്തിരിക്കണം. ഇതിനായുള്ള തുടര്‍ നടപടികള്‍ നടന്നുവരുന്നുണ്ട്.
ചെനക്കലങ്ങാടി- ഇരുമ്പോത്തിങ്ങല്‍ എസ്.സി കോളിനി കുടിവെള്ള പദ്ധതിയുടെ സമര്‍പ്പണം ഇന്ന് വൈകുന്നേരം മൂന്നിന് നൂറുല്‍ഹുദാ മദ്‌റസ പരിസരത്ത് ബ്ലോക്ക് പഞ്ചായത്ത് പ്രസിഡന്റ് കെ. കലാം മാസ്റ്റര്‍ നിര്‍വഹിക്കും. ഗ്രാമപഞ്ചായത്ത് പ്രസിഡന്റ് സഫിയ റസാഖ് തോട്ടത്തില്‍ അധ്യക്ഷയാകും.