അന്തിക്കാട്: താറാവ് കര്‍ഷകര്‍ പ്രതിസന്ധിയില്‍. തീറ്റയ്ക്ക് വരുന്ന അമിത ചെലവാണ് കര്‍ഷകരെ വലയ്ക്കുന്നത്. ആയിരം താറാവിന് തീറ്റയ്ക്കു മാത്രമായി ഒരു ദിവസം 6000 രൂപ ചെലവ് വരുന്നുണ്ട്. കോള്‍ പടവുകളിലേക്ക് തീറ്റയ്ക്ക് താറാവുകളെ ഇറക്കുമ്പോള്‍ ഇടനിലക്കാര്‍ ലേലം വിളിച്ചെടുക്കുന്നതും കര്‍ഷകര്‍ക്ക് തിരിച്ചടിയാകുന്നുണ്ട്. ലേലം വിളിച്ചെടുക്കുന്ന സംഖ്യയേക്കാള്‍ കൂടുതല്‍ തുക ഇടനിലക്കാര്‍ കര്‍ഷകരില്‍ നിന്ന് ഈടാക്കും. കോള്‍പടവ് കമ്മിറ്റിക്കാരും ഇടനിലക്കാരും തമ്മിലുള്ള ഒത്തു കളിയാണ് ഇതിനു പിന്നിലെന്ന് താറാവ് കര്‍ഷകര്‍ ആരോപിച്ചു. ആയിരം താറാവിനെ ഒരു മാസത്തേക്ക് കോള്‍ പടവില്‍ തീറ്റക്കിറക്കണമെങ്കില്‍ 80,000 രൂപ കര്‍ഷകര്‍ നല്‍കണം. ഇതില്‍ ഇടനിലക്കാര്‍ക്ക് നല്ലൊരു സംഖ്യ കിട്ടും. കോള്‍ പാടത്തെ ഞണ്ടും ഞവിനിയും പ്രാണികളുമാണ് താറാവുകളുടെ തീറ്റ. ആറുമാസം പ്രായമായ മുട്ടതാറാവിന് 280 രൂപ നല്‍കിയാണ് കര്‍ഷകര്‍ വാങ്ങുന്നത്. മൂന്നു വര്‍ഷം താറാവ് മുട്ടയിടും. പിന്നീട് താറാവിനെ കര്‍ഷകര്‍ ഇറച്ചിക്കായി വില്‍ക്കും. ഇറച്ചി താറാവ് ഒന്നിന് 150 രൂപ മാത്രമാണ് കര്‍ഷകര്‍ക്ക് ലഭിക്കുന്നത്. ഇവിടെയും ഇടനിലക്കാരുടെ ഇടപെടലുണ്ടെന്ന് കര്‍ഷകര്‍ പറയുന്നു. എട്ട് രൂപക്ക് കര്‍ഷകരില്‍ നിന്നും വാങ്ങുന്ന താറാമുട്ട 11 രൂപയ്ക്കാണ് കച്ചവടക്കാര്‍ വില്‍ക്കുന്നത്. ഇതും കര്‍ഷകര്‍ക്ക് തിരിച്ചടിയാണ്. വിവിധ രോഗങ്ങള്‍ ബാധിച്ച് താറാവുകള്‍ ചാകുന്നതും കര്‍ഷകര്‍രെ ദുരിതത്തിലാക്കുന്നുണ്ട്. താറാവുകളെ തീറ്റക്കിറക്കാന്‍ കേരളത്തിലെ കോള്‍ പടവുകളെ അപേക്ഷിച്ച് തമിഴ്‌നാട്ടിലെ കോള്‍ പടവുകള്‍ ഏറെ ലാഭകരമാണെന്ന് കര്‍ഷകര്‍ പറഞ്ഞു. കൂടാതെ കേരളത്തില്‍ ഗ്രാമപ്രദേശങ്ങളിലെ വട്ട നിലങ്ങളും കര്‍ഷകര്‍ക്ക് ലാഭകരമാണ്. ഇവിടെ ഇടനിലക്കാരുടെ ഇടപെടലുകള്‍ ഇല്ലെന്ന് കര്‍ഷകര്‍ പറയുന്നു. അന്തിക്കാട്, ചാഴൂര്‍, മണലൂര്‍ ഭാഗങ്ങളില്‍ നിരവധി താറാവ് കര്‍ഷകരുണ്ട്. ഇവരുടെ പ്രതിസന്ധി പരിഹരിക്കാന്‍ സര്‍ക്കാര്‍ തലത്തില്‍ ഇടപെടലുകള്‍ ഉണ്ടാകണമെന്ന് കര്‍ഷകര്‍ ആവശ്യപ്പെട്ടു.