തൃച്ഛി: സര്‍ക്കാര്‍ എയ്ഡഡ് സ്‌കൂളില്‍ രണ്ടാം ക്ലാസില്‍ പഠിക്കുന്ന ഏഴു വയസ്സുകാരിയെ പീഡിപ്പിച്ച കേസില്‍ സ്‌കൂള്‍ സെക്രട്ടറി അറസ്റ്റിലായി. തേന്നൂര്‍ ആല്‍വാര്‍തോപ്പ് സ്വദേശി മുഹമ്മദ് സാലിം (57) ആണ് പിടിയിലായത്. രണ്ട് മാസങ്ങള്‍ക്ക് മുമ്പാണ് പീഡനം നടന്നതെന്ന് പൊലിസ് പറഞ്ഞു. വെള്ളിയാഴ്ച രാവിലെ പെണ്‍കുട്ടിയുടെയും അല്‍വാര്‍തോപ്പ് സ്വദേശികളുടെയും നേതൃത്വത്തില്‍ സ്‌കൂളിന് മുന്നില്‍ നടത്തിയ പ്രതിഷേധത്തെ തുടര്‍ന്നാണ് അറസ്റ്റ്. സ്‌കൂളിന് മുന്നില്‍ പൊതുജനം തടിച്ചുകൂടി സംഘര്‍ഷാവസ്ഥയിലായതോടെ തില്ലൈനഗര്‍ പൊലിസ് സുരക്ഷാകവചമൊരുക്കി. കുട്ടിയുടെ മാതാപിതാക്കളില്‍ നിന്ന് പരാതി സ്വീകരിച്ച ശേഷം തില്ലൈ നഗര്‍ പൊലിസ് പ്രതിയെ അറസ്റ്റ് ചെയ്യുകയായിരുന്നു. തുടര്‍ന്ന് ശ്രീരംഗം വനിതാ പൊലിസ് സ്റ്റേഷനിലെ ഇന്‍സ്‌പെക്ടര്‍ പി.സ് ചിത്രക്ക് പ്രതിയെ കൈമാറി. പോക്‌സോ നിയമം ചുമത്തിയാണ് പ്രതിക്കെതിരെ കേസെടുത്തിട്ടുള്ളത്.