ചെന്നൈ: പ്രധാനമന്ത്രി നരേന്ദ്ര മോദിയും ചൈനീസ് പ്രസിഡന്റ് ഷീ ജിന്‍പിങും കൂടിക്കാഴ്ച നടത്തിയ തമിഴ്‌നാട്ടിലെ മഹാബലിപുരത്തെ വൃത്തിയും വെടിപ്പുമുള്ള നാടാക്കി മാറ്റിയതിനു പിന്നിലെ ആളുകള്‍ക്ക് ഒരു മാസമായി കൂലി ലഭിക്കുന്നില്ല. കഴിഞ്ഞ ഒരു മാസമായി രാവും പകലും നാടു വൃത്തിയാക്കുകയായിരുന്നു ഇവര്‍.

സന്ദര്‍ശനത്തിന്റെ ഭാഗമായി നാട് നന്നാക്കുന്നതിനായി ഒരു ഏജന്‍സിയാണ് ആയിരക്കണക്കിന് താല്‍ക്കാലിക ജീവനക്കാരെ എടുത്തത്. എപ്പോഴാണ് ഇതിന്റെ കൂലി ലഭിക്കുകയെന്നും വ്യക്തമായില്ല.

ദേശീയ തൊഴിലുറപ്പ് പദ്ധതി പ്രകാരം ലഭിക്കുന്ന 100 രൂപ മാത്രമേ ലഭിക്കൂയെന്നാണ് ഞങ്ങളുടെ ആശങ്കയെന്ന് ജോലി ചെയ്തിരുന്ന സാവിത്രി എന്ന സ്ത്രീ പറഞ്ഞു. സാധാരണ ജോലി സമയത്തേക്കാള്‍ കൂടുതല്‍ ജോലി ചെയ്തുവെന്നാണ് ഇവര്‍ പറയുന്നത്.