പേരാമ്പ്ര: ചേര്‍മല സാംബവ കോളനിയില്‍ സുരേഷ് ഗോപി എം.പി സന്ദര്‍ശനം നടത്തി. കോളനിയില്‍ പ്രാഥമിക സൗകര്യം, ഗതാഗത സൗകര്യം, കുടിവെള്ളം എന്നിവ ഏര്‍പെടുത്തുമെന്നും, ആവശ്യമായ സാമ്പത്തിക സഹായം നല്‍കുമെന്നും സുരേഷ് ഗോപി കോളനി നിവാസികള്‍ക്ക് ഉറപ്പ് നല്‍കി. തൊട്ടടുത്ത ഗവ. വെല്‍ഫെയര്‍ സ്‌കൂളിലും അദ്ദേഹം സന്ദര്‍ശനം നടത്തി. ഇവിടേക്കാവശ്യമായ കംപ്യൂട്ടര്‍, സ്മാര്‍ട്ട് റൂമിനാവശ്യമായ സഹായം, ട്യൂബ് ലൈറ്റുകള്‍ എന്നിവയും നല്‍കും. വിദ്യാലയത്തോടും വിദ്യാര്‍ഥികളോടും വിവേചനവും, വിദ്വേഷവും കാണിക്കുന്നത് തികഞ്ഞ പാപമാണെന്നും ഇവിടത്തെ വിദ്യാര്‍ഥികളെ സമൂഹത്തിന്റെ മുഖ്യധാരയിലെത്തിക്കുന്നതിന് കേന്ദ്ര സര്‍ക്കാര്‍ ഇടപെട്ട് സഹായിക്കുമെന്നും സുരേഷ് ഗോപി പറഞ്ഞു. ബി.ജെ.പി നിയോജക മണ്ഡലം പ്രസിഡന്റ് എന്‍. ഹരിദാസ് സുരേഷ് ഗോപിയെ ഹാരാര്‍പണം ചെയ്തു. യുവമോര്‍ച്ച സംസ്ഥാന ജനറല്‍ സെക്രട്ടറി പ്രഫുല്‍ കൃഷ്ണന്‍, എ. ബാലചന്ദ്രന്‍, കെ.കെ രജീഷ്, കെ. അനൂപ്, കെ. സുധാകരന്‍, കെ. മധു കൃഷ്ണന്‍ തുടങ്ങിയവരും കൂടെ ഉണ്ടായിരുന്നു. സന്ദര്‍ശന വിവരമറിഞ്ഞ് നിരവധി പേര്‍ സുരേഷ് ഗോപിയെ കാണാനെത്തി. തൊട്ടടുത്ത കിഴിഞ്ഞാണ്യം എ.എല്‍.പി സ്‌കൂളിലും സുരേഷ്‌ഗോപി സന്ദര്‍ശനം നടത്തി.