കിഴിശ്ശേരി: ആലപ്പുഴയില്‍ നടക്കുന്ന സംസ്ഥാന സ്‌കൂള്‍ ജൂഡോ ചാംപ്യന്‍ഷിപ്പില്‍ ഒളവട്ടൂര്‍ യതീംഖാന ഹയര്‍ സെക്കന്‍ഡറി സ്‌കൂള്‍ വിദ്യാര്‍ഥി ടി.വി താജുദ്ദീന്‍ രിഫായിക്ക് സ്വര്‍ണം. പ്ലസ്‌വണ്‍ കൊമേഴ്‌സ് വിദ്യാര്‍ത്ഥിയാണ് താജുദ്ദീന്‍ രിഫായി. ജൂനിയര്‍ ബോയ്‌സ് (90 കിലോക്ക് മുകളില്‍) വിഭാഗത്തില്‍ സ്വര്‍ണം നേടിയതോടെ ഗുജറാത്തില്‍ നടക്കുന്ന ദേശീയ സ്‌കൂള്‍ ഗെയിംസ് ജൂഡോ ചാംപ്യന്‍ഷിപ്പില്‍ കേരളത്തെ പ്രതിനിധീകരിച്ചു പങ്കെടുക്കാന്‍ യോഗ്യത നേടി.
ഒളവട്ടൂര്‍ കരടുകണ്ടം സ്വദേശിയായ താജുദ്ദീന്‍ കഴിഞ്ഞ വര്‍ഷം സ്‌കൂള്‍ ജൂഡോ ചാംപ്യന്‍ഷിപ്പില്‍ വെങ്കലവും അമേച്ചര്‍ ജൂഡോ ചാംപ്യന്‍ഷിപ്പില്‍ വെള്ളിയും അമേച്ചര്‍ ഗുസ്തി ചാംപ്യന്‍ഷിപ്പില്‍ വെള്ളിയും നേടിയിരുന്നു. ഈ വര്‍ഷം സര്‍വകലാശാല ഗ്രൗണ്ടില്‍വച്ച് റിലയന്‍സ് ഗ്രൂപ്പ് നടത്തിയ സ്റ്റേറ്റ് സ്‌പോര്‍ട്‌സ് മീറ്റില്‍ ഷോര്‍ട്ട് പുട്ട് മത്സരത്തില്‍ വെള്ളിയും നേടി. ടി.വി അബ്ദുല്‍ മജീദ്, മാഷിദ ദമ്പതികളുടെ നാലു മക്കളില്‍ രണ്ടാമത്തെ പുത്രനാണ്.
കോച്ച് സിദ്ദീഖലി ഊര്‍ക്കടവ്, സ്‌കൂളിലെ കായികാധ്യാപകന്‍ ടി.പി അബ്ദുല്‍ ഗഫൂര്‍ എന്നിവരാണ് പരിശീലനം നല്‍കിയത്. സ്‌കൂളിലെ മുഹമ്മദ് അഫ്‌ലഹ് ജൂനിയര്‍ ബോയ്‌സ് ( 81 കിലോക്ക് താഴെ) വിഭാഗത്തില്‍ വെള്ളി മെഡല്‍ നേടി.