മാനന്തവാടി: കഴിഞ്ഞ ദിവസങ്ങളില്‍ മാനന്തവാടി-കമ്മന പ്രദേശത്ത് ഭീതിപടര്‍ത്തിയ കാട്ടുകൊമ്പനെ വനത്തിലേക്ക് തുരത്തി. ഇന്നലെ പുലര്‍ച്ചെ മുതല്‍ പ്രദേശത്തെ ഭീതിയിലാഴ്ത്തിയ കാട്ടാനയെയാണ് ബേഗൂര്‍ റെയ്ഞ്ച് ഓഫിസര്‍ നജ്മല്‍ അമീന്റെ നേതൃത്വത്തിലുള്ള വനപാലകരും നാട്ടുകാരും ചേര്‍ന്ന് വനത്തിലേക്ക് തുരത്തിയത്. 

പത്ത് കിലോമീറ്ററോളം ദൂരത്തുള്ള കുറുവാദ്വീപ് വനമേഖലയിലേക്കാണ് ഇന്നലെ രാവിലെ എട്ടേമുക്കാലോടെ ആനയെ തുരത്തിയത്. ചൊവ്വാഴ്ച രാത്രി ഒന്‍പതരയോടെ കൂടല്‍ക്കടവ് പാലത്തിന് അടിയിലൂടെ പുഴ കടന്നാണ് കാട്ടാന നാട്ടിലേക്കിറങ്ങിയത്. പിന്നീട് പയ്യമ്പള്ളി ഭാഗത്ത് കൂടി വന്ന് താന്നിക്കല്‍ വഴി വീണ്ടും പുഴ കടന്ന ആന കമ്മന ഭാഗത്തേക്ക് എത്തുകയായിരുന്നു.