തിരുവനന്തപുരം: നിയമം എല്ലാവര്‍ക്കും ഒരുപോലെ ബാധകമാക്കണമെന്നു ചൂണ്ടിക്കാട്ടി സംസ്ഥാന പൊലിസ് മേധാവി സെന്‍കുമാര്‍ ആഭ്യന്തര വകുപ്പ് അഡീഷനല്‍ ചീഫ് സെക്രട്ടറി സുബ്രതാ വിശ്വാസിനു കത്തുനല്‍കി. പേഴ്‌സനല്‍ സ്റ്റാഫ് അംഗമായിരുന്ന എ.എസ്.ഐ അനില്‍ കുമാറിനെ അനധികൃതമായാണ് ഒപ്പം നിര്‍ത്തിയിരുന്നതെന്ന് ചൂണ്ടിക്കാട്ടി സെന്‍കുമാറിനോട് സര്‍ക്കാര്‍ വിശദീകരണം ആവശ്യപ്പെട്ടിരുന്നു. ഇതിനു നല്‍കിയ മറുപടിയിലാണ് സെന്‍കുമാര്‍ തുറന്നടിച്ചിരിക്കുന്നത്.
മറ്റു ഉദ്യോഗസ്ഥര്‍ക്കെതിരേ ചെറുവിരല്‍ അനക്കാത്ത സര്‍ക്കാര്‍ തന്നോടൊപ്പം നില്‍ക്കുന്നവരെ മടക്കി അയക്കുന്നതിന്റെ കാരണം വ്യക്തമാക്കണമെന്നും സെന്‍കുമാര്‍ മറുപടി കത്തില്‍ ചോദിക്കുന്നു. താങ്കള്‍ക്കുതന്നെ പരിശോധിച്ചാല്‍ മനസിലാകും. ചീഫ് സെക്രട്ടറി നളിനി നെറ്റോയുടെ ഡ്രൈവറും വീട്ടില്‍ സുരക്ഷയ്ക്ക് നിയോഗിച്ചിരിക്കുന്ന പൊലിസുകാരും മറ്റു ഉദ്യോഗസ്ഥരും ചീഫ് സെക്രട്ടറിയ്‌ക്കൊപ്പം കൂടിയിട്ട് വര്‍ഷങ്ങള്‍ കുറേയായി. ഇവര്‍ക്ക് ചീഫ് സെക്രട്ടറിയ്‌ക്കൊപ്പം നില്‍ക്കാനുള്ള ഉത്തരവ് പോലുമില്ല.
ചീഫ് സെക്രട്ടറി നളിനി നെറ്റോ, തച്ചങ്കരി മറ്റു ചില ഉന്നത ഉദ്യോഗസ്ഥര്‍ എന്നിവരെ പേരെടുത്തും ഇവര്‍ അനധികൃതമായി ഒപ്പം കൂട്ടിയിരിക്കുന്ന പൊലിസ് ഉദ്യോഗസ്ഥരുടെ പൂര്‍ണ വിവരങ്ങളും ഉള്‍പ്പെടെയാണ് സെന്‍കുമാര്‍ മറുപടി നല്‍കിയിരിക്കുന്നത്.
അതിനിടെ സംസ്ഥാന സര്‍ക്കാരിനെതിരേ സെന്‍കുമാര്‍ വീണ്ടും സുപ്രിം കോടതിയെ സമീപിക്കാന്‍ ഒരുങ്ങുന്നുവെന്നും സൂചനയുണ്ട്. ഡി.ജി.പി സ്ഥാനത്ത് പ്രവര്‍ത്തിക്കുന്നതിന് തടസം സൃഷ്ടിച്ചെന്ന് ചൂണ്ടിക്കാട്ടിയാണ് കോടതിയെ സമീപിക്കുന്നത്. ഉത്തരവ് നടപ്പിലാക്കാന്‍ വൈകിയതിന് സുപ്രിം കോടതിയില്‍ നിര്‍വ്യാജം ഖേദം രേഖപ്പെടുത്തിയതിനു ശേഷം ചീഫ് സെക്രട്ടറിയുടെ നേതൃത്വത്തില്‍ ഡി.ജി.പിക്കെതിരേ നടത്തിയ നീക്കങ്ങള്‍ കോടതിയലക്ഷ്യമാണെന്നാണ് സെന്‍കുമാറിനുവേണ്ടി സുപ്രിം കോടതിയില്‍ ഹാജരായ അഭിഭാഷകരുടെ നിലപാട്. ഇതുസംബന്ധിച്ച് സീനിയര്‍ അഭിഭാഷകന്‍ ദുഷ്യന്ത് ദവെയില്‍നിന്ന് സെന്‍കുമാറിന് നിയമോപദേശം ലഭിച്ചിട്ടുണ്ടെന്നാണ് വിവരം.