കാസര്‍കോട്: പ്രമുഖ മത പണ്ഡിതനും സമസ്ത സീനിയര്‍ ഉപാധ്യക്ഷനുമായിരുന്ന സി.എം.അബ്ദുല്ല മൗലവിയുടെ കൊലപാതക കേസില്‍ ഉന്നതതല ഉദ്യോഗസ്ഥരെ കൊണ്ട് കേസന്വേഷണം നടത്താന്‍ സി.ബി.ഐ തയാറാകണമെന്ന് സമസ്ത ജില്ലാ പ്രസിഡന്റ് ത്വാഖ അഹമ്മദ് അല്‍ അസ്ഹരി ആവശ്യപ്പെട്ടു.
ഇപ്പോഴത്തെ അന്വേഷണസംഘം രണ്ടു തവണ നല്‍കിയ റിപ്പോര്‍ട്ട് തള്ളുകയും കേസില്‍ അന്വേഷണം നടത്താനും കോടതി ഉത്തരവിട്ടതോടെ നീതിയുടെ കിരണങ്ങള്‍ സി.എം.അബ്ദുല്ല മൗലവിയുടെ കുടുംബത്തിനും പൊതു സമൂഹത്തിനും അധികം വൈകാതെ ലഭിക്കുമെന്ന പ്രതീക്ഷ നല്‍കിയിട്ടുണ്ട്. കോടതി വിധി സ്വാഗതാര്‍ഹമാണെന്ന് ത്വാഖ അഹമ്മദ് അല്‍ അസ്ഹരി പറഞ്ഞു.
കേസില്‍ സി.ബി.ഐ സംഘം 2017 ല്‍ ആദ്യം സമര്‍പ്പിച്ച റിപ്പോര്‍ട്ട് തള്ളുകയും തുടര്‍ന്ന് പ്രാഥമിക തലത്തില്‍ നിന്ന് തന്നെ വീണ്ടും അന്വേഷണം നടത്താനും, ഉന്നത മെഡിക്കല്‍ സംഘത്തിന്റെയും മറ്റു വിദഗ്ധരുടെയും സഹായത്തോടെ കേസ് അന്വേഷണം നടത്തി റിപ്പോര്‍ട്ട് സമര്‍പ്പിക്കാനും കോടതി ഉത്തരവിട്ടിരുന്നു. സംഭവ ദിവസം അബ്ദുല്ല മൗലവിയുടെ കുടുംബാംഗങ്ങള്‍ അമിതമായി ഉറങ്ങാനുണ്ടായ കാരണങ്ങള്‍ കണ്ടെത്തണമെന്നും കോടതി ആവശ്യപ്പെട്ടിരുന്നു.
എന്നാല്‍ കോടതിയുടെ നിര്‍ദേശങ്ങള്‍ പൂര്‍ണമായും പാലിക്കാതെ അന്വേഷണം പ്രഹസനമാക്കി ആദ്യ റിപ്പോര്‍ട്ട് തന്നെ മിനുക്കി കോടതിയില്‍ സമര്‍പ്പിച്ചത് വഴി സി.ബി.ഐ നീതി പീഠത്തേയും പൊതു സമൂഹത്തെയും തെറ്റിദ്ധരിപ്പിക്കാനുള്ള ശ്രമമാണ് വീണ്ടും നടത്തിയത്.
അബ്ദുല്ല മൗലവിയുടെ വ്യക്തി പ്രഭാവവും ജീവിത രീതിയുംസാമൂഹ്യ രംഗത്തെ പ്രവര്‍ത്തനങ്ങളും ഉള്‍പ്പെടെ അന്വേഷണ സംഘം നന്നായി വിലയിരുത്തിയാല്‍തന്നെ സംഭവം കൊലപാതകമാണെന്ന് കണ്ടെത്താന്‍ കഴിയും. മുന്‍ വിധിയോടെയുള്ള അന്വേഷണം നടത്തുന്നത് ഒഴിവാക്കി കേസന്വേഷണം നടത്തി സത്യാവസ്ഥ പുറത്തുകൊണ്ട് വരണമെന്നും ആക്ഷന്‍ കമ്മിറ്റി ഭാരവാഹികള്‍ ആവശ്യപ്പെട്ടു.