തെഹ്‌റാന്‍: അതിര്‍ത്തിയില്‍ സ്വതന്ത്ര വ്യാപാര മേഖലയുണ്ടാക്കാന്‍ ഇറാന്‍ -ഇറാഖ് ധാരണ. ഇറാന്‍ പ്രസിഡന്റ് ഹസന്‍ റൂഹാനിയുമായി തെഹ്‌റാനില്‍ നടന്ന കൂടിക്കാഴ്ചയിലാണ് കരാറിലെത്തിയതെന്ന് ഇറാഖ് പ്രസിഡന്റ് ബര്‍ഹാം സാലിഹ് പറഞ്ഞു.
ഇരു രാജ്യങ്ങള്‍ക്കുമിടയിലെ ബന്ധങ്ങള്‍ പരസ്പരമുള്ള ചരിത്രം, ഭൂമിശാസ്ത്രം തുടങ്ങിയവയുടെ അടിസ്ഥാനത്തിലായിരിക്കുമെന്നു സംയുക്ത വാര്‍ത്താസമ്മേളനത്തിനിടെ അദ്ദേഹം പറഞ്ഞു. ഇറാനുമായുള്ള ബന്ധങ്ങള്‍ തങ്ങള്‍ ശ്രദ്ധിക്കുമെന്നും അദ്ദേഹം വ്യക്തമാക്കി. എന്നാല്‍, സ്വതന്ത്ര വ്യാപാരമേഖല സംബന്ധിച്ചുള്ള കൂടുതല്‍ കാര്യങ്ങള്‍ വ്യക്തമാക്കാന്‍ അദ്ദേഹം തയാറായില്ല. ഇറാഖുമായുള്ള ഉഭയകക്ഷി കരാര്‍ 12 ബില്യന്‍ ഡോളറില്‍നിന്ന് 20 ബില്യനായി അടുത്ത വര്‍ഷത്തോടെ ഉയര്‍ത്തുമെന്നു റൂഹാനി കഴിഞ്ഞ ദിവസം പറഞ്ഞിരുന്നു.
ആണവ കരാറില്‍നിന്നു പിന്‍വാങ്ങിയതിനെ തുടര്‍ന്ന് ഇറാനെതിരേ യു.എസ് ഉപരോധമേര്‍പ്പെടുത്തി രണ്ടാഴ്ചയ്ക്കുള്ളിലാണ് ഇറാഖ് പ്രസിഡന്റിന്റെ തെഹ്‌റാന്‍ സന്ദര്‍ശനം.