സെന്റ് ലൂസിയ: വനിതാ ടി20 ലോകകപ്പില്‍ എ ഗ്രൂപ്പില്‍നിന്ന് ഇംഗ്ലണ്ടും വെസ്റ്റ് ഇന്‍ഡീസും സെമിയില്‍ പ്രവേശിച്ചു. ഗ്രൂപ്പ് ബിയില്‍ ഇന്ത്യയും ആസ്‌ത്രേലിയയും നേരത്തെ സെമിയില്‍ പ്രവേശിച്ചിരുന്നു. ഇന്നും നാളെയും നടക്കുന്ന ഗ്രൂപ്പ് മത്സരങ്ങള്‍ കഴിഞ്ഞാല്‍ മാത്രമേ സെമി ഫൈനലില്‍ ആരൊക്കെ ഏറ്റുമുട്ടുകയെന്ന കാര്യത്തില്‍ വ്യക്തതയുണ്ടാകൂ.
ഗ്രൂപ്പ് എയില്‍ ഏഴു വിക്കറ്റിന് ദക്ഷിണാഫ്രിക്കയെ തകര്‍ത്ത് വിട്ടതോടെയാണ് ഇംഗ്ലണ്ട് സെമിയിലേക്ക് യോഗ്യത നേടിയത്. ഷര്‍ബ്‌സോളിന്റെ ഹാട്രിക്കിന്റെ കരുത്തിലാണ് ഇംഗ്ലണ്ടണ്ട് ദക്ഷിണാഫ്രിക്കയ്‌ക്കെതിരേ മികച്ച ജയം സ്വന്തമാക്കിയത്.
മഴയെ തുടര്‍ന്നു ലങ്കയ്‌ക്കെതിരായ മത്സരം ഉപേക്ഷിക്കപ്പെട്ടിരുന്നതിനാല്‍ ദക്ഷിണാഫ്രിക്കയ്‌ക്കെതിരേ ഇംഗ്ലണ്ടണ്ടിനു ജയം അനിവാര്യമായിരുന്നു. ആദ്യം ബാറ്റ് ചെയ്ത ദക്ഷിണാഫ്രിക്കയെ 19.3 ഓവറില്‍ 85 റണ്‍സില്‍ ഇംഗ്ലണ്ടണ്ട് എറിഞ്ഞിടുകയായിരുന്നു. മറുപടിയില്‍ 14.1 ഓവറില്‍ മൂന്നു വിക്കറ്റിന് ഇംഗ്ലണ്ടണ്ട് ലക്ഷ്യത്തിലെത്തുകയും ചെയ്തു.
ഗ്രൂപ്പിലെ മറ്റൊരു കളിയില്‍ ലങ്കയ്‌ക്കെതിരേ ആദ്യം ബാറ്റ് ചെയ്ത വിന്‍ഡീസ് അഞ്ചു വിക്കറ്റിന് 187 റണ്‍സെടുത്തു.
62 റണ്‍സെടുത്ത ഓപ്പണര്‍ ഹെയ്‌ലി മാത്യൂസാണ് ആതിഥേയരുടെ ടോപ്‌സ്‌കോറര്‍. ദിയാന്‍ഡ്ര ഡോട്ടിന്‍ 49 റണ്‍സെടുത്തു. മറുപടി ബാറ്റിങ്ങിനിറങ്ങിയ ലങ്കക്ക് വിന്‍ഡീസ് ബൗളിങ്ങിന് മുന്നില്‍ പിടിച്ചുനില്‍ക്കാനായില്ല.
17.4 ഓവറില്‍ 104 റണ്‍സിന് ലങ്ക പുറത്തായി. രണ്ട് ഗ്രൂപ്പുകളിലുമായി വെസ്റ്റ് ഇന്‍ഡീസ്-ഇംഗ്ലണ്ട്, അയര്‍ലന്റ്-ന്യൂസിലന്‍ഡ് എന്നീ മത്സരങ്ങള്‍ മാത്രമാണ് ബാക്കിയുള്ളത്. വെള്ളിയാഴ്ച സെമി ഫൈനലുകളും ഞായറാഴ്ച ഫൈനലും നടക്കും.