#പി.ടി പ്രമീഷ്

പുഴയിലോ
തുറസ്സിലോ പെയ്ത്
നിറയുമ്പോലെയല്ല;
അമ്മയുടെ ഓര്‍മപോലെ
പലയിടങ്ങളിലും
അതു മുറിയും.

മുറ്റത്ത് കളിച്ചുകൊണ്ടിരിക്കും
കുട്ടിയിലേയ്‌ക്കോ
അയലില്‍ ഉണങ്ങാനിട്ട
വസ്ത്രങ്ങളിലേയ്‌ക്കോ
മീന്‍കാരനിലേയ്‌ക്കോ ഓടി... ഓടി
അമ്മതൊട്ട് മുറിക്കും മഴകളെത്ര...

ഓടിക്കളിക്കും പയ്കുട്ടിയുടെ ഉടലിലും
വിരിഞ്ഞിറങ്ങും പൂവിനുള്ളിലും
അലിഞ്ഞുചേര്‍ന്ന
മണ്ണുതൊടാത്ത മഴകളെത്ര...

ഇറയത്തുനിന്ന് മകള്‍ കൈകളില്‍
കൊണ്ടുവന്ന മഴവെള്ളം
നഴ്‌സറി പാട്ടില്‍ തിമിര്‍ത്ത്, മയങ്ങി
ചോറ്റുപാത്രത്തില്‍ ഉറങ്ങിപ്പോവും...

കഴുകാന്‍ വച്ച പാത്രങ്ങളില്‍
മഴയുടെ തീന്‍താള്‍...
വീടും തൊടിയും
ഒരേ മഴയെ പലതാളത്തില്‍
വിന്യസിക്കുന്നു.
ചെറുജീവികള്‍, കിളികള്‍
പാട്ടായി മഴയോടൊപ്പം
ചേര്‍ന്നലിയുന്നു.