കൊച്ചി: കലൂര്‍ ജവഹര്‍ലാല്‍ നെഹ്‌റു സ്റ്റേഡിയം ക്രിക്കറ്റ് മത്സരങ്ങള്‍ക്കായി വിട്ടുനല്‍കണമെന്ന് കേരള ഫുട്‌ബോള്‍ അസോസിയേഷനോടും കേരള ബ്ലാസ്റ്റേഴ്‌സിനോടും കേരള ക്രിക്കറ്റ് അസോസിയേഷന്‍ (കെ.സി.എ) ആവശ്യപ്പെടുമെന്ന് ബി.സി.സി.ഐ ജോയിന്റ് സെക്രട്ടറി ജയേഷ് ജോര്‍ജ്. എറണാകുളം പ്രസ് ക്ലബ് സംഘടിപ്പിച്ച മീറ്റ് ദ പ്രസില്‍ സംസാരിക്കുകയായിരുന്നു അദ്ദേഹം.
കലൂര്‍ സ്റ്റേഡിയം കെ.സി.എയുടെ ഉടമസ്ഥതയിലാണ്. സ്റ്റേഡിയം കേരള ഫുട്‌ബോര്‍ അസോസിയേഷന് വിട്ടു നല്‍കിയപ്പോള്‍ മത്സരങ്ങള്‍ കഴിഞ്ഞ് അറ്റകുറ്റപ്പണികള്‍ക്കു ശേഷം കെ.സി.എയ്ക്ക് തിരികെ നല്‍കണമെന്ന വ്യവസ്ഥയുണ്ടായിരുന്നു. എന്നാല്‍, ഐ.എസ്.എല്‍ മത്സരങ്ങള്‍ക്കായി ഫുട്‌ബോള്‍ അസോസിയേഷന്‍ സ്റ്റേഡിയം ഉപയോഗിച്ചതിനാല്‍ കെ.സി.എയ്ക്ക് സ്വന്തമായി സ്റ്റേഡിയം ഇല്ലാത്ത അവസ്ഥയായി.
ഈ സാഹചര്യത്തില്‍ ക്രിക്കറ്റ് മത്സരങ്ങള്‍ നടത്തുന്നതിനും സ്റ്റേഡിയം വിട്ടുനല്‍കണമെന്ന് ആവശ്യപ്പെട്ട് കേരള ബ്ലാസ്റ്റേഴ്‌സ് സി.ഇ.ഒയുമായി ചര്‍ച്ച നടത്തിയതായി ജയേഷ് വ്യക്തമാക്കി. ഇടക്കൊച്ചി സ്റ്റേഡിയം പദ്ധതിയുമായി മുന്‍പോട്ടു പോകും. സ്റ്റേഡിയം നിര്‍മാണവുമായി ബന്ധപ്പെട്ട് നടപടികള്‍ സ്വീകരിക്കണമെന്നാവശ്യപ്പെട്ട് മുഖ്യമന്ത്രി അടക്കമുള്ളവരുമായി നേരിട്ട് ചര്‍ച്ച നടത്തും. സുപ്രിംകോടതിയില്‍ വിനോദ് റായ് ശുപാര്‍ശകളിലെ അപാകതകള്‍ ചൂണ്ടിക്കാണിക്കാന്‍ ബി.സി.സി.ഐ മുന്‍കൈയെടുക്കും.
അതേസമയം, കെ.സി.എയ്‌ക്കെതിരേ മുന്‍ ഓംബുഡ്‌സ്മാന്‍ ജസ്റ്റിസ് വി. രാംകുമാര്‍ ഹൈക്കോടതിയില്‍ ഉന്നയിച്ച ആരോപണങ്ങള്‍ വസ്തുതാവിരുദ്ധമാണെന്ന് ജയേഷ് പറഞ്ഞു. എറണാകുളം ജില്ലാ ക്രിക്കറ്റ് അസോസിയേഷന്‍ പ്രസിഡന്റ് കാര്‍ത്തിക് വര്‍മയും മീറ്റ് ദ പ്രസില്‍ സംബന്ധിച്ചു.