മാനന്തവാടി: പാല്‍വെളിച്ചം പ്രദേശത്ത് കുരങ്ങുശല്യം രൂക്ഷമാകുന്നു. ഓടുപൊളിച്ച് വീടുകളില്‍ കയറുന്ന കുരങ്ങുകള്‍ ഭക്ഷണസാധനങ്ങളും ഉപകരണങ്ങളും നശിപ്പിക്കുന്നത് പതിവായിരിക്കുകയാണ്. ഇന്നലെ പാല്‍വെളിച്ചം കുണ്ടുകാട്ടില്‍ കൃഷ്ണന്റെ വീട്ടില്‍ കയറിയ കുരങ്ങുകള്‍ പാകംചെയ്ത ഭക്ഷണവും കിടക്ക, തുണികള്‍ എന്നിവയും നശിപ്പിച്ചു. സ്ഥലത്തെത്തിയ വനപാലകരെ കുരങ്ങുശല്യത്തിനു പരിഹാരം കാണണമെന്നാവശ്യപ്പെട്ട് നാട്ടുകാര്‍ ഉച്ചവരെ ഉപരോധിച്ചു. പ്രശ്‌നം പരിഹരിക്കുമെന്ന് റെയ്ഞ്ച് ഓഫിസര്‍ ഉറപ്പുനല്‍കിയതിനെത്തുടര്‍ന്നാണ് ഉപരോധം അവസാനിപ്പിച്ചത്.
സമരത്തിന് സണ്ണി ജോര്‍ജ്, പ്രദീപന്‍ പാലങ്കര, ടി.സി ജോസഫ്, ടി.ആര്‍ മോഹനന്‍, ശ്യംകുമാര്‍ നേതൃത്വം നല്‍കി.