തൃശൂര്‍: പെരുന്നാള്‍ അനുബന്ധ ദിവസങ്ങളില്‍ പരീക്ഷ നടത്തുന്ന സര്‍വകലാശാല നിലപാടില്‍ പ്രതിഷേധിച്ച് എം.എസ്.എഫ് ജില്ലാ കമ്മിറ്റി ആരോഗ്യ സര്‍വകലാശാലയില്‍ ഉപരോധം നടത്തി.
 വര്‍ഷങ്ങളായി പെരുന്നാളിന് അടുത്ത ദിവസങ്ങളിലാണ് സര്‍വകലാശാല പരീക്ഷ വന്നുകൊണ്ടിരിക്കുന്നത്. ഇത് മൂലം വിദ്യാര്‍ഥികള്‍ക്ക് പെരുന്നാള്‍ ആഘോഷങ്ങള്‍ക്കായി വീടുകളില്‍ പോകാനും മറ്റും വലിയ പ്രയാസം നേരിടുന്നുണ്ട്. ഒട്ടു മിക്ക വിദ്യാര്‍ഥികള്‍ക്കും ഹോസ്റ്റല്‍ മുറികളില്‍ പെരുന്നാള്‍ ആഘോഷിക്കേണ്ട അവസ്ഥയിലാണ്.
ഉപരോധത്തെ തുടര്‍ന്ന് സര്‍വകലാശാല വൈസ്. ചാന്‍സിലറുടെ നിര്‍ദേശ പ്രകാരം പരീക്ഷാ കണ്‍ട്രോളര്‍ നേതാക്കളുമായി ചര്‍ച്ച നടത്തി.
ഇപ്രാവശ്യത്തെ പരീക്ഷാ നടപടികള്‍ വളരെ അധികം പിന്നിട്ടതിനാല്‍ മാറ്റിവെക്കേണ്ടി വരുന്നതിലുള്ള പ്രായോഗിക പ്രയാസം കണ്‍ട്രോളര്‍ വ്യക്തമാക്കി. അടുത്ത വര്‍ഷം മുതല്‍ ഈ വിഷയത്തില്‍ കൃത്യമായി അനുകൂല നടപടി സ്വീകരിക്കാം എന്ന ഉറപ്പിന്റെ അടിസ്ഥാനത്തില്‍ സമരം അവസാനിപ്പിച്ചു. എം.എസ്.എഫ് ജില്ലാ പ്രസിഡന്റ് അഫ്‌സല്‍ യൂസഫ്, ജന.സെക്രട്ടറി അല്‍ റസിന്‍, ഭാരവാഹികളായ റംഷാദ് പള്ളം, പി.വൈ ഫസല്‍, ഗഫൂര്‍ ചേലക്കര, വിങ് കണ്‍വീനര്‍ അബ്ദുല്‍ ഹസീബ് നേതൃത്വം നല്‍കി.