ബിനുമാധവന്‍

നെയ്യാറ്റിന്‍കര: അരുവിയുടെ തീരങ്ങളിലും നദിക്കരകളിലും പുഴയോരങ്ങളിലും പാടങ്ങളുടെ വരമ്പുകളിലും സുലഭമായി കണ്ടിരുന്ന കൈത ചെടികള്‍ ഇന്ന് നാട്ടിന്‍പുറങ്ങളില്‍ അവൂര്‍വ വസ്തുവായി. ഈ കൈതോലകളില്‍ നിന്ന് നിര്‍മിക്കുന്ന പായ്, വട്ടി, കുട്ട, ബാഗ് തുടങ്ങിയ വസ്തുക്കള്‍ക്ക് മുന്‍കാലങ്ങളില്‍ വിപണികളില്‍ ആവശ്യക്കാരേറെയായിരുന്നു. മുള്ളുകള്‍ നിറഞ്ഞ കൈതോലകള്‍ ശേഖരിച്ച് മുള്ളുകള്‍ മാറ്റി കീറി ഉണക്കിയോ തിളച്ച വെള്ളത്തില്‍ പുഴുങ്ങി ഉണക്കിയ ശേഷമാണ് ഉല്‍പ്പന്നങ്ങള്‍ക്ക് വിനിയോഗിച്ചിരുന്നത്. ഏറെ ഈടുറ്റ ഉല്‍പ്പന്നങ്ങള്‍ ലഭിക്കുന്നതിനു വേണ്ടിയാണ് ഇപ്രകാരം ചെയ്തിരുന്നത്.
ഏറെ ശ്രമകരവും കഠിനവുമായ പണിയാണ് കൈതോല ഉല്‍പ്പന്ന നിര്‍മിതി. അതിന് വൈദഗ്ധ്യം നേടിയ തൊഴിലാളികളും വേണമായിരുന്നു. പുതിയ തലമുറയ്ക്ക് ഈ തൊഴിലിനോട് താല്‍പ്പര്യം ലേശവും ഇല്ലാഞ്ഞതിനാല്‍ കൈതോല ഉല്‍പ്പന്നങ്ങള്‍ വിപണികളില്‍ കിട്ടാതെ വന്നു. തുടര്‍ന്ന് കര്‍ഷകര്‍ കൈതച്ചെടികള്‍ വെട്ടി തീയിടുകയോ മണ്ണിനടിയില്‍ കുഴിച്ചിടുകയോ ഉണ്ടായി. മാത്രവുമല്ല കൈതോല കൂട്ടങ്ങള്‍ പാമ്പുകളുടെ ഈറ്റില്ലവുമായിരുന്നു. കൈതോല ചെടികള്‍ നിറഞ്ഞുനില്‍ക്കുന്ന സ്ഥലത്തുകൂടി പോകുന്നവര്‍ക്ക് പാമ്പുകടിയേറ്റ് മരിച്ച കഥകള്‍ ഏറെ പറയുവാനുണ്ട് ഇന്നാട്ടുകാര്‍ക്ക്. ഇവയുടെ ഭീഷണി ഒഴിവാക്കുന്നതിനു വേണ്ടി കൈതോല ചെടികള്‍ നിറഞ്ഞു നില്‍ക്കുന്ന പ്രദേശങ്ങല്‍ പാടെ നശിപ്പിച്ച ചരിത്രവും കര്‍ഷകര്‍ പങ്കുവെക്കുന്നു.
കൈതോലകള്‍ ഉണങ്ങുന്നതിനു വേണ്ട ആസിഡ്-അമ്ലങ്ങള്‍ തളിച്ച് കഴിഞ്ഞാല്‍ ഒരാഴ്ചയ്ക്കുള്ളില്‍ അവ പൂര്‍ണമായും ഉണങ്ങും. തുടര്‍ന്ന് ഉടമകള്‍ അവയെ കത്തിച്ച് ചാരമാക്കും. അങ്ങനെ കൈതോല ചെടികളും ഉല്‍പ്പന്നങ്ങളും നാട്ടില്‍ നിന്നും വിപണികളില്‍ നിന്നും പൂര്‍ണമായും തുടച്ചു നീക്കി. ഉല്‍പ്പന്നങ്ങളില്‍ വിവിധ നിറത്തിലുള്ള ചായങ്ങള്‍ പുരട്ടി അനേകം ഡിസൈനുകളില്‍ വിപണികളിലെത്തുമ്പോള്‍ ആവശ്യക്കാര്‍ ഏറെയുണ്ടായിരുന്നു. ചോദിക്കുന്ന വിലയും ലഭിച്ചിരുന്നു. അവ മാര്‍ക്കറ്റില്‍ ലഭ്യമല്ലാതെ വന്നപ്പോള്‍ ജനം കൈതോല ഉല്‍പ്പന്നങ്ങളെ പാടെ മറന്നു.
കൈതോല പായയില്‍ കിടന്നുറങ്ങിയാല്‍ വാതം തുടങ്ങിയ രോഗങ്ങള്‍ ബാധിക്കാറില്ലന്ന് പഴമക്കാര്‍ പറയുന്നു. അവരുടെ ആരോഗ്യത്തിന്റെ രഹസ്യവും മറ്റൊന്നല്ല. ഔഷധ മൂല്യങ്ങളടങ്ങിയ ഈ പായയില്‍ കിടന്നാല്‍ സുഖകരമായ ഉറക്കം ലഭിക്കുമെന്നും ആധുനിക പായ ഉപയോഗിക്കു മ്പോള്‍ ഉറക്കത്തിന് പെടാ പാട് ഉണ്ടാകുന്നുവെന്നുമാണ് മുന്‍മുറകാരുടെ പരാതികള്‍.