കോവളം: കോവളം ഹവ്വാ ബീച്ചില്‍ കടയുടെ പൂട്ട് പൊളിച്ച് മോഷണം നടത്തിയ യുവാവിനെ കോവളം പൊലിസ് പിടികൂടി. കോവളം നീലകണ്ട കോളനിയില്‍ ആലുനിന്ന വിളയില്‍ ദിലീപ് ഖാന്‍ (35) ആണ് പിടിയിലായത്.
തിങ്കളാഴ്ച അര്‍ദ്ധരാത്രിയോടെ കോവളം എസ്.ഐ അജിത്ത് കുമാറിന്റെ നേതൃത്വത്തില്‍ കോവളം പൊലിസ് ബീച്ചില്‍ പട്രോളിങ് നടത്തുന്നതിനിടെയാണ് പ്രതി പിടിയിലായതെന്നും തൊണ്ടി സഹിതമാണ് ഇയാളെ പിടികൂടിയതെന്നും കോവളം എസ്.ഐ പറഞ്ഞു. പട്രോളിങിനിടെ സംശയാസ്പദമായ നിലയില്‍ കണ്ട പ്രതിയെ പിടികൂടി നടത്തിയ പരിശോധനയില്‍ ഇയാളില്‍ നിന്നും കാഷ്മീരി തുണിത്തരങ്ങള്‍ കണ്ടതിനെ തുടര്‍ന്ന് നടത്തിയ ചോദ്യം ചെയ്യലില്‍ സമീപത്തെ കാഷ്മീരി ഷോപ്പില്‍ നിന്നും കവര്‍ന്നതാണ് തുണിത്തരങ്ങള്‍ എന്ന് പ്രതി സമ്മതിച്ചതായും തുണിത്തരങ്ങള്‍ക്ക് മൂവായിരം രൂപയോളം വിലവരുമെന്നും പൊലിസ് പറഞ്ഞു. കടയുടെ പൂട്ട് പൊളിച്ച് അകത്ത് കയറിയാണ് മോഷണം നടത്തിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.