പള്ളിക്കല്‍: പള്ളിക്കല്‍ ബസാര്‍ ബസ് സ്റ്റാന്‍ഡ് കവാടത്തിലും സ്റ്റാന്‍ഡിലേക്ക് ബസുകള്‍ കടന്നുപോകുന്ന പള്ളിക്കല്‍ തെരു റോഡിലും അനധികൃതമായി വാഹനങ്ങള്‍ പാര്‍ക്ക് ചെയ്യുന്നത് മൂലം സ്റ്റാന്‍ഡിലേക്ക് പ്രവേശിക്കുന്ന ബസുകള്‍ക്ക് പ്രയാസം സൃഷ്ടിക്കുന്നതായി ബസ് ജീവനക്കാരുടെ പരാതി.
പള്ളിക്കല്‍ ബസാറില്‍ നിന്നും ഫറോക്ക്, കോഴിക്കോട്, പൂത്തൂര്‍, ആല്‍പറമ്പ്, കൂനൂള്‍മാട് എന്നീ ഭാഗങ്ങളിലേക്ക് സര്‍വിസ് നടത്തുന്ന ബസുകള്‍ മാത്രമാണ് നിലവില്‍ ബസ് സ്റ്റാന്‍ഡില്‍ പ്രവേശിക്കുന്നത്. കൊണ്ടോട്ടിയില്‍ നിന്നും പള്ളിക്കല്‍ ബസാര്‍-പരുത്തിക്കോട് വഴി യൂനിവേഴ്‌സിറ്റി റൂട്ടില്‍ സര്‍വിസ് നടത്തുന്ന ബസുകള്‍ സ്റ്റാന്‍ഡില്‍ പ്രവേശിക്കാറില്ല.
ഈ റൂട്ടിലോടുന്ന ബസുകള്‍ ടൗണിലെ ജുമാ മസ്ജിദ് ജങ്ഷനില്‍ നിന്നും പരുത്തിക്കോട് റോഡിലേക്ക് തിരിഞ്ഞ് സ്റ്റാന്‍ഡില്‍ പ്രവേശിക്കാതെയാണ് പോകുന്നത്.
ബസുകള്‍ സ്റ്റാന്‍ഡില്‍ പ്രവേശിക്കാത്തതിനെതിരേ വിവിധ സംഘടനകളും നാട്ടുകാരും നിരവധി പരാതികള്‍ നല്‍കിയെങ്കിലും ബസ്റ്റാന്‍ഡില്‍ പ്രവേശിക്കില്ലായെന്ന ഉറച്ച നിലപാടിലാണ് ബസ് ബസ് ജീവനക്കാര്‍. ഇത്തരം ബസുകളുടെ പേരില്‍ നടപടിയെടുക്കാന്‍ പൊലിസും മോട്ടോര്‍ വാഹന വകുപ്പും ഇതുവരെ തയാറായില്ല.
ദിനംപ്രതിയുള്ള ടൗണിലെ ഗതാഗതക്കുരുക്കും ബസ് സ്റ്റാന്‍ഡിലേക്കുള്ള റോഡിലും പ്രവേശന കവാടത്തിലുമുള്ള അനധികൃത പാര്‍ക്കിങും മൂലമുണ്ടാകുന്ന ഗതാഗതക്കുരുക്കും കാരണം സമയത്തിന് സര്‍വിസ് നടത്താന്‍ കഴിയാത്തതിനാലാണ് സ്റ്റാന്‍ഡില്‍ പ്രവേശിക്കാന്‍ തയ്യാറാവാത്തതെന്നാണ് ബന്ധപ്പെട്ട അധികാരികളെ ബസ് ജീവനക്കാര്‍ അറിയിച്ചത്.