തലശ്ശേരി: പുതുതായി ആരംഭിക്കുന്ന ആറു തീരദേശ പൊലിസ് സ്റ്റേഷനുകള്‍ മുഖ്യമന്ത്രി പിണറായി വിജയന്‍ ഇന്ന് രാവിലെ 10.30ന് തലശ്ശേരി കോസ്റ്റല്‍ പൊലിസ് സ്റ്റേഷന്‍ അങ്കണത്തില്‍ ഉദ്ഘാടനം ചെയ്യും.
കുമ്പള, തൃക്കരിപ്പൂര്‍, പൊന്നാനി, മണക്കടവ്, അറത്തുങ്കല്‍, തലശ്ശേരി എന്നിവിടങ്ങളിലാണ് തീരദേശ പൊലിസ് സ്റ്റേഷനുകള്‍ ആരംഭിക്കുന്നത്. ഇതില്‍ തലശ്ശേരി ഒഴികെയുള്ള മറ്റ് സ്റ്റേഷനുകള്‍ വീഡിയോ കോണ്‍ഫറന്‍സ് വഴിയാണ് ഉദ്ഘാടനം ചെയ്യുക. എ.എന്‍ ഷംസീര്‍ എം.എല്‍.എ അധ്യക്ഷനാവും. മുല്ലപ്പള്ളി രാമചന്ദ്രന്‍ എം.പി, തലശ്ശേരി നഗരസഭാ ചെയര്‍മാന്‍ സി.കെ രമേശന്‍, ജില്ലാ പൊലിസ് മേധാവി ശിവവിക്രം, ജില്ലാ കലക്ടര്‍ മീര്‍ മുഹമ്മദലി, പി. വിജയന്‍, ബല്‍റാംകുമാര്‍ ഉപാധ്യായ, എ.ആര്‍ ചവാന്‍, എം. സുധീര്‍ കുമാര്‍ സംസാരിക്കും.