മുംബൈ: തുടര്‍ച്ചയായ രണ്ട് മത്സരങ്ങളിലെ തോല്‍വിക്ക് പകരം ചോദിച്ച് ഒഡിഷ എഫ്.സി. ഇന്നലെ നടന്ന മത്സരത്തില്‍ മുംബൈ സിറ്റിയെ 4-2 എന്ന സ്‌കോറിനാണ് ഒഡിഷ പരാജയപ്പെടുത്തിയത്. മുംബൈയുടെ ഹോം ഗ്രൗണ്ടായ മുംബൈ അരീനയില്‍ നടന്ന മത്സരത്തില്‍ മുംബൈക്ക് മേല്‍ ഒഡിഷ സമ്പൂര്‍ണ ആധിപത്യം നേടി.
ഇരുപകുതികളിലുമായി ഇരട്ടഗോളുകള്‍ നേടിയ ജീസസ് സന്റാനയാണ് ഒഡിഷയുടെ വിജയശില്‍പ്പി. 21, 72 മിനുട്ടുകളിലായിരുന്നു താരത്തിന്റെ ഗോളുകള്‍. സിസ്‌കോ (21), ജെറി മൗവിങ്താംഗ (40) എന്നിവരാണ് മറ്റു സ്‌കോറര്‍മാര്‍. 51-ാം മിനുട്ടില്‍ മുഹമ്മദ് ലാര്‍ബിയുടെ പെനാല്‍റ്റി ഗോളും ഇഞ്ചുറി ടൈമില്‍ ഒഡിഷ ഗോളി ഫ്രാന്‍സിസ്‌കോ ഡൊറോന്‍സോറോയുടെ സെല്‍ഫ് ഗോളും മുംബൈക്ക് ആശ്വാസമായി. ആദ്യപകുതിയില്‍ മുംബൈയെ നിഷ്പ്രഭരാക്കുന്ന കളിയാണ് ഒഡിഷ കാഴ്ചവച്ചത്. രണ്ട@ാംപകുതിയില്‍ കൂടുതല്‍ ഒത്തിണക്കത്തോടെ കളിച്ച മുംബൈ തിരിച്ചുവരവിനായി കഠിനാധ്വാനം ചെയ്‌തെങ്കിലും ഒഡിഷയുടെ നാലാം ഗോളും വീണതോടെ അവരുടെ വിധി കുറിക്കപ്പെടുകയായിരുന്നു. ഇന്ന് നടക്കുന്ന മത്സരത്തില്‍ നോര്‍ത്ത് ഈസ്റ്റ് യുനൈറ്റഡും ഗോവയും തമ്മില്‍ ഏറ്റുമുട്ടും. നോര്‍ത്ത് ഈസ്റ്റ് യുനൈറ്റഡിന്റെ ഹോം ഗ്രൗണ്ടിലാണ് മത്സരം.