കോഴിക്കോട്: ഗവ. മാനസികാരോഗ്യ കേന്ദ്രത്തില്‍ വര്‍ഷങ്ങളായി കഴിയുന്ന ഇതരസംസ്ഥാനത്തു നിന്നുള്ള അന്തേവാസികളെ നാട്ടിലേക്ക് തിരിച്ചയക്കാന്‍ കലക്ടര്‍ പരിഭാഷകരെ തേടുന്നു. തന്റെ ഔദ്യോഗിക ഫേസ്ബുക്ക് പേജിലാണ് കലക്ടര്‍ യു.വി ജോസ് പരിഭാഷകരെ തേടി കുറിപ്പിട്ടത്.
മേല്‍വിലാസം ഇല്ലാതെ മാനസികാരോഗ്യ കേന്ദ്രത്തില്‍ വര്‍ഷങ്ങളായി കഴിയുന്നവര്‍ക്ക് അവരുടെ ബന്ധുക്കളെ കണ്ടെത്താനുള്ള എന്തെങ്കിലും സാധ്യതയുണ്ടോയെന്ന് അന്വേഷിക്കുന്നതിന്റെ ഭാഗമായാണ് പുതിയ നീക്കം. കഴിഞ്ഞ ദിവസം ആശുപത്രിയില്‍ നടന്ന ആദാലത്തില്‍ 20 വര്‍ഷമായി ഇവിടെ ജീവിക്കുന്നവര്‍ ഉള്‍പ്പടെയുള്ള 30ല്‍പ്പരം സ്ത്രീകള്‍ പങ്കെടുത്തിരുന്നു.
ജില്ലാ ഭരണ കൂടം, ജുഡിഷ്യറി, പൊലിസ്, സാമൂഹ്യ ക്ഷേമം, ആരോഗ്യം എന്നീ സര്‍ക്കാര്‍ വകുപ്പ് പ്രതിനിധികള്‍ക്കൊപ്പം സന്നദ്ധ പ്രവര്‍ത്തകരുമാണ് അദാലത്തില്‍ പങ്കെടുത്തത്. രോഗം നിയന്ത്രണ വിധേയരായവരായിരുന്നു പങ്കെടുത്ത അന്തേവാസികളില്‍ ഭൂരിഭാഗവും. ഈ അദാലത്തില്‍ നിന്നാണ് ഇങ്ങനെ ഒരാശയം കലക്ടര്‍ കണ്ടെത്തിയത്. ഉറ്റവരെയും ഉടയവരെയും കാണാന്‍ ആഗ്രഹിക്കുന്ന അവര്‍ അവ്യക്തമായ ഓര്‍മയില്‍, മനസിലാകാത്ത ഭാഷയില്‍ മാതാവിനെ, പിതാവിനെ, മക്കളെ, കൂടപ്പിറപ്പുകളെ തേടുകയാണ്. മനോനില തെറ്റിയ സമയത്ത് വീട് വിട്ടിറങ്ങിയ ഇവരുടെ തിരിച്ചു വരവും കാത്ത് വഴിക്കണ്ണുമായി കഴിയുന്ന മാതാപിതാക്കളും മക്കളുമൊക്കെ ഏതോ വിദൂരദിക്കിലുണ്ടാകും. ഇവരെ ഏതെങ്കിലും വിധത്തില്‍ ബന്ധിപ്പിക്കാനാവുമോയെന്ന അന്വേഷണത്തിന് സഹായകമാകാനാണ് കലക്ടര്‍ പോസ്റ്റിലൂടെ ഉദ്ദേശിക്കുന്നത്. വിഷയത്തില്‍ നിയമത്തിന്റെ പരിധിയില്‍ നിന്നുകൊണ്ട് വ്യക്തികള്‍ക്കും സംഘടനകള്‍ക്കും പലതും ചെയ്യാനാകുമെന്നും കലക്ടര്‍ കുറിപ്പില്‍ പറയുന്നു.
അന്തേവാസികളോടൊപ്പം മൂന്നു മണിക്കൂര്‍ ചെലവഴിച്ച് അവര്‍ പറയുന്ന കാര്യങ്ങളില്‍നിന്ന് അവരുടെ നാടിനെ കുറിച്ചും വീട്ടുകാരെ പറ്റിയും എന്തെങ്കിലും മനസിലാക്കിയെടുക്കാന്‍ പറ്റുന്ന ഇതരസംസ്ഥാന ഭാഷകള്‍ സംസാരിക്കാനറിയുന്ന സന്നദ്ധ പ്രവര്‍ത്തകരുടെ സഹായമാണ് കലക്ടര്‍ ആവശ്യപ്പെടുന്നത്. സംരംഭത്തില്‍ പങ്കാളികളാകാന്‍ താല്‍പര്യമുള്ളവര്‍ 9847736000 എന്ന നമ്പറില്‍ വിളിക്കുമല്ലോ എന്നും കലക്ടര്‍ ചോദിക്കുന്നുണ്ട്.