പൂച്ചാക്കല്‍: മഴയെ തുടര്‍ന്ന് ചേര്‍ത്തല - അരൂക്കുറ്റി റോഡരികില്‍ പുല്ലുകള്‍ വളര്‍ന്നു ദിശാ ബോര്‍ഡുകള്‍ പോലും കാണാനില്ല.
റോഡരികിലെ സ്‌കൂളുകള്‍, കലുങ്കുകള്‍,വളവുകള്‍ പാലങ്ങള്‍ തുടങ്ങിയവ സംബന്ധിച്ചു യാത്രക്കാര്‍ക്കുള്ള മുന്നറിയിപ്പു ബോര്‍ഡാണ് റോഡരികുകളില്‍ പൊതുമരാമത്ത് വകുപ്പ് സ്ഥാപിച്ചിട്ടുള്ളത്.എന്നാല്‍ മഴയെ തുടര്‍ന്ന് റോഡരികില്‍ പുല്ലുകള്‍ വളര്‍ന്നു ദിശാബോര്‍ഡുകള്‍ കാണാനാകാത്ത അവസ്ഥയാണ്. പുല്ലുകള്‍ വളര്‍ന്നിരിക്കുന്നതിന്റെ ഇടയിലാണ് മാലിന്യ നിക്ഷേപവും കൊതുകു വളര്‍ച്ചയും ഉണ്ടാകുന്നത്.
മഴക്കാല ശുചീകരണത്തിന്റെ ഭാഗമായി നാട് മുഴുവന്‍ ശുചീകരിക്കുകയും ബോധവല്‍കരണം നടത്തുകയും ചെയ്യുന്ന അധികൃതര്‍ റോഡരികുകള്‍ ശ്രദ്ധിക്കുന്നില്ല. അവിടം വൃത്തിയാക്കി മാലിന്യനീക്കവും കൊതുകു നശീകരണവും നടത്തേണ്ടത് അത്യാവശ്യമാണ്.റോഡരികിലെ പുല്ലുകള്‍ക്കിടെ തെരുവുനായകള്‍ താവളമടിക്കുന്നതും അവ റോഡിനു കുറുകെ ചാടുന്നതും ഇരുചക്രവാഹനങ്ങള്‍ അപകടത്തില്‍പ്പെടുന്നതും നിത്യസംഭവമായിരിക്കുകയാണ്.