വെല്ലിങ്ടണ്‍: ന്യൂസിലന്‍ഡിലെ സ്റ്റുവര്‍ട്ട് ദ്വീപിലെ ബീച്ചില്‍ 145 തിമിംഗലങ്ങള്‍ കൂട്ടത്തോടെ കരക്കടിഞ്ഞു. ശനിയാഴ്ച രാത്രിയോടെയാണ് തിമിംഗലങ്ങള്‍ കരക്കെത്തിയത്. തിമിംഗലങ്ങള്‍ കരക്കടിയുന്നത് ആദ്യം പ്രദേശവാസികളാണ് കണ്ടത്. വിവരമറിഞ്ഞ് അധികൃതരെത്തുമ്പോഴേക്ക് പകുതിയിലേറെ ചത്തിരുന്നു.

അവശേഷിച്ച തിമിംഗലങ്ങളെ കടലിലേക്കു തള്ളി വിടാനുള്ള ശ്രമങ്ങള്‍ വിജയിച്ചിട്ടില്ല. ഒരു തലവന് കീഴിലാണ് തിമിംഗലങ്ങള്‍ കൂട്ടത്തോടെ യാത്ര ചെയ്യാറ്. തലവന് വഴിതെറ്റിയതാകാം കൂട്ടത്തോടെ ഇവ കരക്കെത്താന്‍ കാരണമെന്നാണ് സമുദ്ര ഗവേഷകരുടെ അഭിപ്രായം. കൂടാതെ കടലിലെ പ്രതികൂലമായ കാലാവസ്ഥയും കാരണമായേക്കാമെന്ന് ഇവര്‍ ചൂണ്ടിക്കാട്ടുന്നു.

സംഭവത്തില്‍ ന്യൂസിലന്‍ഡ് സമുദ്രഗവേഷണ വിഭാഗം അന്വേഷണം ആരംഭിച്ചിട്ടുണ്ട്.