കയ്പമംഗലം: 16ാം വയസില്‍ വയസ് തിരുത്തി ഡ്രൈവിങ് ലൈസന്‍സ് എടുത്തയാള്‍ 23 വര്‍ഷങ്ങള്‍ക്കു ശേഷം പിടിയില്‍. പെരിഞ്ഞനം സ്വദേശി തറയപ്പുറത്തു വീട്ടില്‍ രാജേഷിനെയാണ് കൊടുങ്ങല്ലൂര്‍ ജോയിന്റ് ആര്‍.ടി.ഒ.ഓഫിസില്‍ വച്ച് പിടികൂടിയത്. ബാഡ്ജ് എടുക്കാന്‍ വന്നപ്പോഴാണ് ഇയാള്‍ 23 വര്‍ഷങ്ങള്‍ക്കു മുന്‍പ് നടത്തിയ കുറ്റം കണ്ടെത്തിയത്. രാജേഷിന്റെ എസ്.എസ്.എല്‍.സി ബുക്കിലുള്ള ശരിയായ ജനന തിയതി 12.07.1977 എന്നാണ്. ഇയാള്‍ വയസില്‍ കൃത്രിമം നടത്തി ഉദ്യോഗസ്ഥരെ തെറ്റിധരിപ്പിച്ചു നേടിയ ഡ്രൈവിങ് ലൈസന്‍സില്‍ 12.07.1975 എന്നാണ് ജനന തിയതി രേഖപ്പെടുത്തിയിരിക്കുന്നത്. ബാഡ്ജ് എടുക്കാനായി എസ്.എസ്.എല്‍.സി ബുക്കും ഡ്രൈവിങ് ലൈസന്‍സും ജോയിന്റ് ആര്‍.ടി.ഓഫിസില്‍ മോട്ടോര്‍ വെഹിക്കിള്‍ ഇന്‍സ്‌പെക്ടര്‍ മുന്‍പാകെ ഹാജരാക്കിയപ്പോഴാണ് രണ്ടു രേഖകളിലെയും ജനന തിയതികള്‍ തമ്മിലുള്ള വ്യത്യാസം കണ്ടെത്തിയത്. ഇതേ തുടര്‍ന്ന് ഇത് സംബന്ധിച്ച റിപ്പോര്‍ട്ട് തൃശൂര്‍ ആ. ടി ഓഫിസിലേക്ക് അയക്കുമെന്ന് എം.വി.ഐ ഗിരീഷ് പറഞ്ഞു.