ലണ്ടന്‍: ഇക്കഴിഞ്ഞ ബാഡ്മിന്റണ്‍ ടൂര്‍ണമെന്റുകളിലെ മികച്ച പ്രകടനത്തിന് പിന്നാലെ റാങ്കിങ്ങില്‍ കരിയര്‍ നേട്ടമുണ്ടാക്കി ഇന്ത്യന്‍ പുരുഷ സഖ്യമായ സാത്വിക് സായ്‌രാജ് റാങ്കിറെഡ്ഡിയും ചിരാഗ് ഷെട്ടിയും. നേരത്തേ ലോക ഒന്‍പതാം നമ്പര്‍ സഖ്യമായ ഇവര്‍ പുതിയ റാങ്കിങില്‍ രണ്ട് സ്ഥാനം കയറി ഏഴിലെത്തി. ഫ്രഞ്ച് ഓപ്പണില്‍ ഫൈനലിലെത്തിയതും ചൈന ഓപ്പണില്‍ സെമിഫൈനലിലെത്തിയതുമാണ് ഇവര്‍ക്ക് നേട്ടമായത്. തുടര്‍ച്ചയായി രണ്ട് ടൂര്‍ണമെന്റുകളില്‍ കാട്ടിയ മികവാണ് റാങ്കിങ്ങിലും പ്രകടമായത്. 2019ലെ തായ്‌ലന്‍ഡ് ഓപ്പണ്‍ കിരീടവും ഇവര്‍ ചൂടിയിരുന്നു. നേരത്തേ ഒന്‍പതാം സ്ഥാനത്തെത്തിയതോടെ റാങ്കിങ്ങില്‍ ആദ്യ പത്തില്‍ കടക്കുന്ന ആദ്യ ഇന്ത്യന്‍ പുരുഷ ഡബിള്‍സ് ജോഡികളായി ഇവര്‍ മാറിയിരുന്നു.