തിരുവനന്തപുരം: ചോദ്യോത്തര വേളയില്‍ സ്പീക്കര്‍ പി.ശ്രീരാമകൃഷ്ണന്റെ ജന്മദിനം ഓര്‍മിപ്പിച്ച് പി.സി. ജോര്‍ജ്. മിന്നല്‍ രക്ഷാ കവചങ്ങള്‍ സംബന്ധിച്ച ഉപചോദ്യം ചോദിക്കാനായി സ്പീക്കര്‍ ക്ഷണിച്ചപ്പോഴാണ് ജോര്‍ജ് ഇക്കാര്യം പറഞ്ഞത്.
ചോദ്യത്തിന് മുന്‍പ് പ്രധാനപ്പെട്ട ഒരു കാര്യം പറയാനുണ്ട് എന്ന മുഖവുരയോടെയാണ് ജോര്‍ജ് പറഞ്ഞത്. ജവഹര്‍ലാല്‍ നെഹ്‌റുവിന്റെ ജന്മദിനത്തില്‍ അങ്ങ് നിയമസഭാ വളപ്പിലെ പ്രതിമയില്‍ പുഷ്പാര്‍ച്ചന നടത്തി. പക്ഷെ ആരും അങ്ങയെ സ്മരിച്ചില്ല. സഭയുടെ നാഥനായ അങ്ങയുടെ ജന്മദിനമാണ്. അങ്ങേക്ക് ഞങ്ങള്‍ വളരെ ആത്മാര്‍ഥമായി ജന്മദിനാശംസ നേരുന്നു എന്നായിരുന്നു ജോര്‍ജ് പറഞ്ഞത്. ഈ സമയമാണ് അംഗങ്ങള്‍ സ്പീക്കറുടെ ജന്മദിനം ഇന്നലെയായിരുന്നുവെന്ന് അറിയുന്നത്.