തിരുവനന്തപുരം: വാളയാര്‍ പെണ്‍കുട്ടികളെ പീഡിപ്പിച്ച് കൊലപ്പെടുത്തിയ കേസിലെ പ്രതികളെ രക്ഷപ്പെടുത്താന്‍ വഴിയൊരുക്കിയ പൊലിസ് ഉദ്യോഗസ്ഥരെ പിരിച്ചുവിടണമെന്നും കേസിന്റെ പുനരന്വേഷണം സി.ബി.ഐക്ക് വിടണമെന്നും ആവശ്യപ്പെട്ട് മുസ്‌ലിം യൂത്ത്‌ലീഗിന്റെ ആഭിമുഖ്യത്തില്‍ ക്ലിഫ് ഹൗസിലേക്ക് നടത്തിയ 'സമരപ്പന്ത'ത്തില്‍ സംഘര്‍ഷം. മാര്‍ച്ചിന് നേരെ പൊലിസ് ജലപീരങ്കിയും കണ്ണീര്‍വാതകവും പ്രയോഗിച്ചു.
പാളയം രക്തസാക്ഷി മണ്ഡപത്തിന് സമീപത്തുനിന്ന് ആരംഭിച്ച പ്രകടനം ദേവസ്വം ബോര്‍ഡ് ജങ്ഷനില്‍ ബാരിക്കേഡ്‌വച്ച് പൊലിസ് തടഞ്ഞു. ബാരിക്കേഡ് കടന്ന് മുന്നോട്ട് പോകാന്‍ ശ്രമിച്ചവര്‍ക്ക് നേരെ രണ്ടുതവണ പൊലിസ് ജലപീരങ്കിപ്രയോഗിച്ചെങ്കിലും പ്രവര്‍ത്തകര്‍ പിന്‍മാറിയില്ല. പിന്നീട് പൊലിസ് കണ്ണീര്‍വാതക ഷെല്‍ പ്രയോഗിച്ചു. നിരവധി പ്രവര്‍ത്തകര്‍ക്ക് പരുക്കേറ്റു. തുടര്‍ന്ന് പ്രവര്‍ത്തകര്‍ പന്തംകൊളുത്തി പ്രതിഷേധിച്ചു.
സമരപ്പന്തം പ്രതിപക്ഷ ഉപനേതാവ് ഡോ. എം.കെ മുനീര്‍ ഉദ്ഘാടനം ചെയ്തു. നജീബ് കാന്തപുരം അധ്യക്ഷനായി. എം.എല്‍.എമാരായ അഡ്വ. എന്‍. ഷംസുദ്ദീന്‍, പി.കെ ബഷീര്‍, പി. ഉബൈദുല്ല, പാറക്കല്‍ അബ്ദുല്ല, മുസ്‌ലിംലീഗ് സംസ്ഥാന സെക്രട്ടറി ബീമാപള്ളി റഷീദ്, ടി.പി അഷ്‌റഫലി, എം.പി നവാസ് സംസാരിച്ചു. യൂത്ത്‌ലീഗ് സംസ്ഥാന ജന. സെക്രട്ടറി പി.കെ ഫിറോസ് സ്വാഗതവും വൈസ് പ്രസിഡന്റ് പി.എ അഹമ്മദ് കബീര്‍ നന്ദിയും പറഞ്ഞു. സംസ്ഥാന ഭാരവാഹികളായ ഫൈസല്‍ ബാഫഖി തങ്ങള്‍, പി. ഇസ്മാഈല്‍, പി.കെ സുബൈര്‍, മുജീബ് കാടേരി, പി.ജി മുഹമ്മദ്, കെ.എസ് സിയാദ്, വി.വി മുഹമ്മദലി, പി.പി അന്‍വര്‍ സാദത്ത്, ഡി. നൗഷാദ്, ഹാരിസ് കരമന പങ്കെടുത്തു.