മാന്നാര്‍:പ്രളയത്തില്‍ കഷ്ടപ്പെട്ട് കഴിയുന്നവരെ സഹായിക്കുന്നതിന് പകരം രാഷ്ട്രീയ പാര്‍ട്ടികള്‍ വിവാദങ്ങള്‍ സൃഷ്ടിച്ച് തമ്മില്‍ തല്ലുകയാണെന്ന് കൊല്ലം രൂപതാ മെത്രാന്‍ ഡോ.പോള്‍ ആന്റണി മുല്ലശ്ശേരി പറഞ്ഞു. ക്വയിലോണ്‍ സോഷ്യല്‍ സര്‍വിസ് സൊസൈറ്റിയുടെ നേതൃത്വത്തില്‍ പ്രളയത്തില്‍ വീട് നഷ്ടപ്പെട്ടവര്‍ക്കുള്ള സഹായം വിതരണം ചെയ്ത് പ്രസംഗിക്കുകയായിരുന്നു അദ്ദേഹം.
കേവലം വോട്ട് ബാങ്ക് സൃഷ്ടിക്കുവാന്‍ വേണ്ടിയുള്ള രാഷ്ട്രീയ പാര്‍ട്ടികളുടെ തമ്മില്‍ തല്ല് അവസാനിപ്പിച്ചില്ലെങ്കില്‍ ജനങ്ങള്‍ അരാഷ്ട്രീയ വാദികളായി മാറി രാഷ്ട്രീയ പാര്‍ട്ടികളോട് കടക്ക് പുറത്ത് എന്ന് പറയുന്ന കാലം അതി വിദൂരമല്ലെന്ന് മെത്രാന്‍ കൂട്ടി ചേര്‍ത്തു. ഇതോടനുബന്ധിച്ച് നടന്ന സമ്മേളനം കൊടികുന്നില്‍ സുരേഷ് എംപി ഉദ്ഘാടനം ചെയ്തു. ഡോ. ബൈജൂ ജൂലിയാന്‍, മോണ്‍.വിന്‍സന്റ് മച്ചാര്‍ഡോ, ഫാ.ലെജു ഐസക്ക്, ഫാ.ബെനറ്റ്.എം.പി, ഫാ.അമല്‍രാജ്, പഞ്ചായത്തംഗം സേവ്യര്‍കുന്നുംപുറം, കെഎല്‍സിഎ രൂപതാ സെക്രട്ടറി ഡൊമനിക് ജോസഫ് പ്രസംഗിച്ചു. കൊല്ലം രൂപതാ മെത്രാന്റെ ദുരിതാശ്വാസ ഫണ്ടില്‍ നിന്ന് ഒരു കോടി രൂപയാണ് പ്രളയത്തില്‍ വീട് നഷ്ടപ്പെട്ടവര്‍ക്കായി വിതരണം ചെയ്തത്.