ഇരിട്ടി: നോപാര്‍ക്കിങ് ഏരിയയില്‍ ബസ് നിര്‍ത്തിയിട്ടെന്നാരോപിച്ച് യാത്രക്കാരെ പെരുവഴിയിലിറക്കിവിട്ട് കെ.എസ്.ആര്‍.ടി.സി ബസും ജീവനക്കാരേയും കസ്റ്റഡിയിലെടുത്ത സംഭവത്തില്‍ മുഴക്കുന്ന് എസ്.ഐ.ക്കെതിരേ ജില്ലാ പൊലിസ് മേധാവിക്ക് ട്രാന്‍സ്‌പോര്‍ട്ടധികൃതര്‍ പരാതി നല്‍കി.
വ്യാഴാഴ്ച ഉച്ചയ്ക്ക് രണ്ടുമണിക്ക് കാക്കയങ്ങാട് ടൗണില്‍ നിര്‍ത്തിയിട്ട കെ.എസ്.ആര്‍.ടി.സി തലശ്ശേരി ഡിപ്പോയിലെ ബസാണ് മുഴക്കുന്ന് എസ്.ഐ രാജേഷ് യാത്രക്കാരെ ഇറക്കിവിട്ട ശേഷം കസ്റ്റഡിയിലെടുത്തത്. എസ്.ഐക്കെതിരെ  നടപടിയാവശ്യപ്പെട്ട് കെ.എസ്.ആര്‍.ടി.സി കണ്ണൂര്‍  ഹെഡ്ക്വാര്‍ട്ടേഴ്‌സ് ജില്ലാ ട്രാന്‍സ്‌പോര്‍ട്ട് ഓഫിസര്‍ പ്രദീപാണ് പരാതി നല്‍കിയത്. ആറളം ഫാമിലേക്കുള്‍പ്പെടെ സര്‍വിസ് നടത്തുന്ന ഏക ബസാണ് കസ്റ്റഡിയിലെടുത്തത്. യാത്രക്കാരെ പെരുവഴിയിലാക്കി ഡ്രൈവറുള്‍പ്പെടെയുള്ള ജീവനക്കാരെ കസ്റ്റഡിയിലെടുത്ത് മണിക്കൂറുകളോളം പൊലിസ് സ്റ്റേഷനില്‍ പിടിച്ചുവെച്ച് ഔദ്യോഗിക  കൃത്യനിര്‍വഹണം തടസ്സപ്പെടുത്തുകയും ബസ്സിന്റെ ട്രിപ്പ് മുടക്കുകയും ചെയ്ത എസ്.ഐക്കെതിരെ വകുപ്പുതല നടപടി വേണമെന്നും പരാതിയില്‍ പറയുന്നു. 12,000 രൂപ കെ.എസ്.ആര്‍.ടി.സിക്ക് സര്‍വിസ് മുടങ്ങിയതു മൂലം നഷ്ടം സംഭവിച്ചതായി പറയുന്നു.  ജാമ്യമെടുക്കാന്‍ പൊലിസ് ആവശ്യപ്പെട്ടെങ്കിലും ജാമ്യമെടുക്കാന്‍ തയാറാവാതെ തങ്ങള്‍ ജയിലിലേക്ക് പൊയ്‌ക്കോളാമെന്നു ജീവനക്കാര്‍ അറിയിച്ചതോടെവൈകുന്നേരം അഞ്ചു മണിക്ക്  ജീവനക്കാരെയും ബസും പൊലിസ്  പറഞ്ഞുവിടുകയായിരുന്നു. ജനമധ്യത്തില്‍ വെച്ച് അകാരണമായി തങ്ങളെ കസ്റ്റഡിയിലെടുത്ത മുഴക്കുന്ന് എസ്.ഐക്കെതിരേ മാനനഷ്ടത്തിന് കേസ് നല്‍കുമെന്നും ജീവനക്കാര്‍ അറിയിച്ചു.