തിരുവനന്തപുരം: നിയമസഭ ആരംഭിക്കുന്ന സഭാ ടി.വിയുടെ ലോഗോ പ്രകാശന ചടങ്ങിനോടനുബന്ധിച്ചു പ്രദര്‍ശിപ്പിച്ച നിയമസഭാചരിത്രം പറയുന്ന ഹ്രസ്വചിത്രത്തില്‍നിന്നു ലീഗ് നേതാക്കളെ ഒഴിവാക്കിയതിനു പിന്നാലെ സി.പി.ഐ നേതാക്കളെയും ഒഴിവാക്കിയതായി പരാതി.
ഉദ്ഘാടന ദിവസം ചിത്രം പ്രദര്‍ശിപ്പിച്ചപ്പോള്‍ മിണ്ടാതിരുന്ന സി.പി.ഐ അംഗങ്ങള്‍ ഇനി പരാതിയുമായി സ്പീക്കറെ സമീപിക്കാനാണ് തീരുമാനം. മുന്‍ മുഖ്യമന്ത്രിമാരായ സി. അച്യുതമേനോനെയും പി.കെ വാസുദേവന്‍നായരേയും ഒഴിവാക്കിയതിനെതിരേയാണ് സി.പി.ഐ അംഗങ്ങള്‍ സ്പീക്കര്‍ക്ക് പരാതി നല്‍കാന്‍ തീരുമാനിച്ചിരിക്കുന്നത്. കെ.എം സീതി സാഹിബിനേയും, സി.എച്ച് മുഹമ്മദ് കോയയേയും ഒഴിവാക്കിയെന്ന് ആരോപിച്ച് അന്നു തന്നെ ലീഗ് ചടങ്ങ് ബഹിഷ്‌കരിച്ചിരുന്നു.
ചരിത്രത്തില്‍നിന്ന് ഒഴിവാക്കാനുള്ള ബോധപൂര്‍വമായ ശ്രമമാണെന്നാണ് സി.പി.ഐയുടെ ആരോപണം. അടുത്ത മന്ത്രിസഭാ യോഗത്തിലും ഇക്കാര്യം ഉന്നയിക്കാന്‍ സി.പി.ഐ മന്ത്രിമാര്‍ തീരുമാനിച്ചിട്ടുണ്ട്.