മൂഡബിദ്രി: റിലേകളില്‍ റെക്കോര്‍ഡ് നേട്ടവുമായി കാലിക്കറ്റ്, എം.ജി വനിതകള്‍. 4-400 വനിതാ റിലേയില്‍ കാലിക്കറ്റ് സര്‍വകലാശാല വനിതകള്‍ 3:38.08 സെക്കന്‍ഡില്‍ ഫിനിഷ് ചെയ്താണ് പുതിയ റെക്കോര്‍ഡ് സ്ഥാപിച്ചത്.
ശക്തമായ പോരാട്ടം നടന്ന ഒറ്റലാപ്പിന്റെ റിലേയില്‍ വെള്ളി നേടിയ എം.ജി വനിതകളും (3:40.04) റെക്കോര്‍ഡ് മറികടന്ന പ്രകടനം നടത്തി. ഷഹര്‍ബാന സിദ്ദീഖ്, യു.വി ശ്രുതിരാജ്, അബിത മേരി മാനുവല്‍, ഒളിംപ്യന്‍ ജിസ്‌ന മാത്യു എന്നിവരാണ് കാലിക്കറ്റിനായി സുവര്‍ണ ബാറ്റണ്‍ ഏന്തിയത്. കഴിഞ്ഞ വര്‍ഷം എം.ജി സ്ഥാപിച്ച 3:40.21 സെക്കന്‍ഡ് സമയമാണ് കാലിക്കറ്റ് തിരുത്തിയത്. വനിതകളുടെ 4-100 മീറ്റര്‍ റിലേയില്‍ എം.ജി പുതിയ റെക്കോര്‍ഡുമായാണ് സ്വര്‍ണം നേടിയത്. 46.31 സെക്കന്‍ഡിലായിരുന്നു എം.ജിയുടെ സുവര്‍ണ കുതിപ്പ്.
2009 ല്‍ എം.ജി വനിതകള്‍ തന്നെ സ്ഥാപിച്ച 46.48 സെക്കന്‍ഡ് റെക്കോര്‍ഡ് ബുക്കില്‍നിന്ന് മാഞ്ഞു. എന്‍.എസ് സിമി, കെ.എസ് അഖില, അഖിന ബാബു, എസ്.എസ് സ്‌നേഹ എന്നിവരാണ് സുവര്‍ണ ബാറ്റണുമായി സ്പ്രിന്റ് റിലേയില്‍ കുതിച്ചത്. പുരുഷ വിഭാഗം 4-100 മീറ്റര്‍ റിലേയില്‍ കാലിക്കറ്റ് സ്വര്‍ണം നേടി.
40.88 സെക്കന്‍ഡില്‍ ഫിനിഷ് ചെയ്താണ് കാലിക്കറ്റ് സ്വര്‍ണം സ്വന്തമാക്കിയത്. കെ.പി അജ്മല്‍, നിബിന്‍ ബിജു, ടി. മിഥുന്‍, കെ.പി അശ്വിന്‍ എന്നിവരാണ് സുവര്‍ണ നേട്ടത്തിലേക്ക് ബാറ്റണേന്തിയത്. 41.04 സെക്കന്‍ഡില്‍ എം.ജി വെള്ളി നേടി.