തിരുവനന്തപുരം: രഞ്ജി ട്രോഫിയില്‍ മധ്യപ്രദേശുമായുള്ള മത്സരത്തില്‍ കേരളത്തിന് തകര്‍ച്ച. ആദ്യം ദിനം തന്നെ 63 റണ്‍സിന് കേരളത്തെ കൂടാരം കയറ്റിയ മധ്യപ്രദേശ് ബൗളിങ്‌നിര കേരളത്തിന്റെ നടുവൊടിച്ചു. ആദ്യ ദിനം കളിനിര്‍ത്തുമ്പോള്‍ മധ്യപ്രദേശ് രണ്ട് വിക്കറ്റ് നഷ്ടത്തില്‍ 161 റണ്‍സ് നേടിയിട്ടുണ്ട്. ഇതോടെ അവര്‍ക്ക് 98 റണ്‍സിന്റെ ലീഡായി.
ടോസ് നേടി ബാറ്റിങ് തിരഞ്ഞെടുത്ത കേരളം തകര്‍ച്ചയോടെയാണ് തുടങ്ങിയത്. കുല്‍ദീപ് സെന്നിന്റെ ഓവറില്‍ ജലജ് സക്‌സേനയെയും രോഹന്‍ പ്രേമിനെയും നഷ്ടമായതോടെ കേരളത്തിന്റെ ആത്മവിശ്വാസം നഷ്ടപ്പെട്ടു. 10 ഓവര്‍ പിന്നിട്ടപ്പോള്‍ 14 റണ്‍സ് മാത്രം നേടിയ കേരളത്തിന്റെ നാലു വിക്കറ്റുകള്‍ നഷ്ടമായി.
മധ്യപ്രദേശിന്റെ ആവേശ് ഖാന്‍ നാലു വിക്കറ്റും കുല്‍ദീപ് സെന്‍ മൂന്ന് വിക്കറ്റും സ്വന്തമാക്കി. കേരളത്തിന്റെ മൂന്ന് താരങ്ങള്‍ മാത്രമാണ് രണ്ടക്കം കണ്ടത്. മൂന്ന് താരങ്ങളെ സംപൂജ്യരായി മധ്യപ്രദേശ് ബൗളിങ് നിര പവലിയനിലേക്കയച്ചു.