മുക്കം: വികസനക്കുതിപ്പിന് കാലെടുത്ത് വച്ച് മുക്കം നഗരസഭ. 20 വര്‍ഷം കൊണ്ട് വിവിധ പദ്ധതികള്‍ നടപ്പാക്കിയാണ് മലയോര മേഖലയുടെ സിരാ കേന്ദ്രമെന്നറിയപ്പെടുന്ന മുക്കത്തെ ഉന്നതിയിലെത്തിക്കാന്‍ നഗരസഭ പരിശ്രമിക്കുന്നത്. ഇതിനായുള്ള 'മുക്കം മാസ്റ്റര്‍ പ്ലാന്‍ 2037' പദ്ധതി നഗരസഭയില്‍ തുടക്കം കുറിച്ചു. 20 വര്‍ഷം കൊണ്ട് സമ്പൂര്‍ണമായും വികസനം നേടിയ നഗരസഭയാക്കി മുക്കത്തെ മാറ്റുമെന്നാണ് പ്രഖ്യാപനം.
ഇതിന്റെ ഭാഗമായി നേരത്തെ നടന്ന ശില്‍പ്പശാലയില്‍ വിവിധ മേഖലകളില്‍ നിന്നുള്ളവരുടെ ഉപദേശ നിര്‍ദേശങ്ങള്‍ ലഭിച്ചിരുന്നു. നിര്‍ദേശങ്ങള്‍ ക്രോഡീകരിച്ച്  ജില്ലാ ടൗണ്‍ പ്ലാനിങ് ഓഫിസറുടെ നേതൃത്വത്തില്‍ സര്‍വേ പൂര്‍ത്തീകരിച്ച് നഗരസഭയ്ക്ക് കൈമാറും. ഇതില്‍ നിന്നും നഗരസഭയുടെ കാര്‍ഷിക മേഖലയുടേയും വീടുകളുടേയും വ്യവസായ സ്ഥാപനങ്ങളുടേയും അടക്കം മുഴുവന്‍ വിവരങ്ങളും നഗരസഭക്ക് ലഭിക്കും. ഇതിന്റെ കരട് കൗണ്‍സില്‍ യോഗത്തില്‍ അവതരിപ്പിച്ച് ആവശ്യമായ ഭേദഗതികള്‍ വരുത്തി അംഗീകാരം നേടും. തുടര്‍ന്ന് കരട് രേഖ പ്രസിദ്ധീകരിച്ച് സര്‍ക്കാരിന് സമര്‍പ്പിക്കാനാണ് നഗരസഭ ഭരണ സമിതി ഉദ്ദേശിക്കുന്നത്.
പദ്ധതിയുടെ ഭാഗമായി വിദ്യാര്‍ത്ഥികള്‍ക്കും നിര്‍ദേശങ്ങള്‍ സമര്‍പ്പിക്കാം. ഇതിന്റെ ഭാഗമായി വിദ്യാര്‍ഥികള്‍ക്കായി മത്സര പരിപാടികളും സംഘടിപ്പിച്ചു. എല്‍.പി, യു.പി, ഹൈസ്‌കൂള്‍, ഹയര്‍ സെക്കന്‍ഡറി വിദ്യാര്‍ഥികള്‍ക്കായാണ് മത്സരം സംഘടിപ്പിച്ചത്. എല്‍.പി വിദ്യാര്‍ഥികള്‍ക്കായി 'കളിമുക്കം, കളിമുറ്റം' എന്ന പേരില്‍ ചിത്രരചനയും യു.പി വിഭാഗം വിദ്യാര്‍ത്ഥികള്‍ക്കായി 'എന്റെ മുക്കം എന്റെ സ്വപ്നത്തില്‍' എന്ന വിഷയത്തില്‍ പെന്‍സില്‍ ഡ്രോയിങും ഹൈസ്‌കൂള്‍ വിഭാഗം വിദ്യാര്‍ഥികള്‍ക്കായി 'മുക്കം പട്ടണം; ഇന്നിന്റെ ആകുലതകളും നാളെയുടെ വികസന സങ്കല്‍പ്പങ്ങളും' എന്ന വിഷയത്തില്‍ ഉപന്യാസ രചനയുമാണ് സംഘടിപ്പിച്ചത്.
ഹയര്‍ സെക്കന്‍ഡറി വിഭാഗം വിദ്യാര്‍ഥികള്‍ക്കായി 'മുക്കം പട്ടണം കുരുക്കില്ലാത്ത ഗതാഗതം; കുറ്റമറ്റ നിര്‍വഹണം' എന്ന വിഷയത്തില്‍ റിപ്പോര്‍ട്ട് നിര്‍മാണവും സംഘടിപ്പിച്ചു. വിവിധ സ്‌കൂളുകളില്‍ നിന്നായി തെരഞ്ഞെടുക്കപ്പെട്ട വിദ്യാര്‍ഥികള്‍ മത്സരത്തില്‍ പങ്കെടുത്തു.
മുക്കം ഓര്‍ഫനേജ് സ്‌കൂളില്‍ നടന്ന മത്സരം വിദ്യാഭ്യാസ സ്റ്റാന്‍ഡിങ് കമ്മറ്റി ചെയര്‍മാന്‍ എന്‍. ചന്ദ്രന്‍ ഉദ്ഘാടനം ചെയ്തു. പി. അബ്ദു അധ്യക്ഷനായി. പി. പ്രശോഭ് കുമാര്‍, മുക്കം വിജയന്‍, പി. ബ്രിജേഷ്, അബ്ദുല്‍ ഗഫൂര്‍, അസിസ്റ്റന്റ് ടൗണ്‍ പ്ലാനിംഗ് ഓഫിസര്‍ ഷമീര്‍, റിയാസ് സംസാരിച്ചു.