കുവൈത്ത് സിറ്റി: മെഥനോൾ കലർന്ന മദ്യം കഴിച്ചതിനെ തുടർന്ന് മരിച്ചവരുടെ എണ്ണം 13 ആയി. പതിമൂന്ന് പ്രവാസി തൊഴിലാളികൾ മരിക്കുകയും ഡസൻ കണക്കിന് ആളുകളെ ആശുപത്രിയിൽ പ്രവേശിപ്പിക്കുകയും ചെയ്തതായി കുവൈത്ത് ആരോഗ്യ മന്ത്രാലയം അറിയിച്ചു. ശനിയാഴ്ച മുതൽ, വിഷമദ്യവുമായി ബന്ധപ്പെട്ട 63 കേസുകൾക്ക് ആശുപത്രികൾ ചികിത്സ നൽകിയതായി മന്ത്രാലയം വ്യക്തമാക്കി. കുവൈത്ത് വിഷ നിയന്ത്രണ കേന്ദ്രവും സുരക്ഷാ ഏജൻസികളും മറ്റ് അധികാരികളും സംയുക്തമായി പ്രവർത്തിച്ച് വരികയാണ്.

ALSO READ: കുവൈത്തില്‍ വിഷമദ്യം കഴിച്ച് 10 പ്രവാസികള്‍ മരിച്ചു; മലയാളികളും ഉണ്ടെന്ന് റിപ്പോര്‍ട്ട് 

രോഗികളിൽ വിവിധ ലക്ഷണങ്ങൾ പ്രകടമായിരുന്നു. 31 പേർക്ക് മെക്കാനിക്കൽ വെന്റിലേഷൻ ആവശ്യമായി വന്നപ്പോൾ, 51 പേർക്ക് അടിയന്തര ഡയാലിസിസ് നൽകേണ്ടി വന്നു. 21 പേർക്ക് കാഴ്ചശക്തി നഷ്ടപ്പെട്ടതായി റിപ്പോർട്ടുണ്ട്. മദ്യത്തിന്റെ ഉറവിടവും വിതരണത്തിൽ ഉൾപ്പെട്ടവരെയും കണ്ടെത്താൻ അധികൃതർ അന്വേഷണം ആരംഭിച്ചിട്ടുണ്ട്. അനിയന്ത്രിതമായ മദ്യപാനത്തിന്റെ അപകടങ്ങളെക്കുറിച്ച് പൊതുജനങ്ങൾക്ക് മുന്നറിയിപ്പും നൽകിയിട്ടുണ്ട്.

മെഥനോൾ വിഷബാധ സംശയിക്കുന്നവർ ഉടൻ ആശുപത്രികളുമായി ബന്ധപ്പെടുകയോ പ്രത്യേക ഹോട്ട്‌ലൈനുകളിൽ വിളിക്കുകയോ ചെയ്യണമെന്ന് ആരോഗ്യ മന്ത്രാലയം അഭ്യർത്ഥിച്ചു.

the death toll in kuwait’s poisoned liquor tragedy has climbed to 13, with several others hospitalized in critical condition. authorities continue investigating the source of the toxic alcohol.