തിരുവനന്തപുരം: ആഗസ്റ്റ് 14ന് സര്‍വകലാശാലകളില്‍ വിഭജന ഭീതി ദിനം ആചരിക്കണമെന്ന നിര്‍ദേശം ആവര്‍ത്തിച്ച് രാജ്ഭവന്‍. നേരത്തെ നല്‍കിയ കത്തിന്റെ ഓര്‍മ്മപ്പെടുത്തലായാണ് വൈസ് ചാന്‍സിലര്‍മാര്‍ക്ക് വീണ്ടും ഗവര്‍ണര്‍ കത്ത് നല്‍കിയത്. തൊട്ടുപിന്നാലെ കാമ്പസുകളില്‍ വിഭജന ദിനം ആചരിക്കേണ്ടതില്ലെന്ന് നിര്‍ദേശം നല്‍കി കോളജ് വിദ്യാഭ്യാസ ഡയറക്ടറേറ്റും രംഗത്തെത്തി. ഉന്നതവിദ്യാഭ്യാസ വകുപ്പിന്റെ നിര്‍ദേശപ്രകാരമാണ് നടപടി. 

ഗവര്‍ണറുടെ നടപടിക്കെതിരെ ഭരണപക്ഷവും, പ്രതിപക്ഷവും ഒരുപോലെ രംഗത്തെത്തിയിരുന്നു. പരിപാടി സംഘടിപ്പിച്ചാല്‍ തടയുമെന്ന് എസ്എഫ്‌ഐയും, കെഎസ്‌യുവും പ്രഖ്യാപിച്ചിരുന്നു. ഭൂരിപക്ഷം യൂണിവേഴ്‌സിറ്റികളും ഗവര്‍ണറുടെ നിര്‍ദേശത്തില്‍ തുടര്‍നടപടികള്‍ സ്വീകരിക്കാന്‍ തയ്യാറായിട്ടില്ല. ഗവര്‍ണറുടെ തീരുമാനം കേരളത്തിലെ കാമ്പസുകളില്‍ നടത്തേണ്ടതില്ലെന്ന നിലപാടാണ് ഉന്നവിദ്യാഭ്യാസ വകുപ്പിനുമുള്ളത്. നാളിതുവരെ ഇല്ലാത്ത പുതിയ നിര്‍ദേശം സാമുധായിക ധ്രുവീകരണം ലക്ഷ്യം വെച്ചുള്ളതാണെന്നും, അത് അനുവദിക്കില്ലെന്നും ഉന്നതവിദ്യാഭ്യാസ മന്ത്രി ആര്‍ ബിന്ദു പറഞ്ഞു. 

ALSO READ: തിരുവനന്തപുരത്ത് ഓട്ടോറിക്ഷയുടെ വെളിച്ചം കണ്ണിലടിച്ചതിനെ തുടർന്ന് തർക്കം; ഡ്രൈവർക്ക് കുത്തേറ്റു 

അതിനിടെ കണ്ണൂര്‍, കേരള, എപിജെ അബ്ദുല്‍ കലാം സാങ്കേതിക യൂണിവേഴ്‌സിറ്റി എന്നിവര്‍ അഫിലിയേറ്റ് ചെയ്ത കോളജുകളില്‍ വിഭജന ഭീതി ദിനം ആചരിക്കാന്‍ നിര്‍ദേശം നല്‍കിയത് വിവാദമായിരുന്നു. വിസിയുടെ നിര്‍ദേശപ്രകാരമാണ് ഉത്തരവ്.