മുംബൈ: ടി20 ലോകകപ്പ് ലക്ഷ്യമിട്ട് നിയമിക്കപ്പെട്ട മുന്‍ ഇന്ത്യന്‍ താരം രമേഷ് പവാറിന്റെ കാലാവധി അവസാനിച്ചതോടെ ബി. സി.സി.ഐ ഇന്ത്യന്‍ വനിതാ ടീമിന് പുതിയ പരിശീലകനെ തേടുന്നു.
സമീപകാലത്തെ മികച്ച പ്രകടനത്തിന്റെ അടിസ്ഥാനത്തില്‍ പവാറിനെ നിലനിര്‍ത്തും എന്നാണ് കരുതപ്പെട്ടിരുന്നതെങ്കിലും ടീമിലുണ്ടണ്ടായ വിവാദമാണ് കോച്ചിന്റെ സ്ഥാനം തെറിപ്പിച്ചത്. മുന്‍ ക്യാപ്റ്റനും ഇതിഹാസതാരവുമായ മിതാലി രാജിന്റെ കരിയര്‍ അവസാനിപ്പിക്കാന്‍ കോച്ച് രമേഷ് പവാര്‍ ശ്രമിച്ചെന്ന ആരോപണവും പ്രത്യാരോപണങ്ങളുമെല്ലാം ഇന്ത്യന്‍ വനിതാ ടീമിനെ പ്രതിസന്ധിയിലാക്കിയിരുന്നു. വെസ്റ്റ് ഇന്‍ഡീസില്‍ സമാപിച്ച വനിതാ ലോക ടി20യുടെ സെമി ഫൈനലിനുള്ള ടീമില്‍ നിന്ന് മിതാലി ഒഴിവാക്കപ്പെട്ടതോടെയാണ് വിവാദങ്ങളുടെ തുടക്കം.
പവാര്‍ തന്റെ കരിയര്‍ തന്നെ ഇല്ലാതാക്കാന്‍ ശ്രമിച്ചതായി മിതാലി ആരോപിച്ചപ്പോള്‍ മിതാലി അഹങ്കാരിയും പിടിവാശിക്കാരിയുമാണെന്നാണ് പവാര്‍ മറുപടി പറഞ്ഞത്. പവാറിന്റെ കരാര്‍ അവസാനിച്ചതോടെ പ്രശ്‌നങ്ങളും അവസാനിച്ചേക്കുമെന്നാണ് കരുതുന്നത്.
പവാറിനെ വീണ്ടണ്ടും പരിഗണിക്കാന്‍ സാധ്യത തീരെ കുറവാണെന്ന് മുതിര്‍ന്ന ബി.സി.സി.ഐ അംഗവും വെളിപ്പെടുത്തി. ഈ വര്‍ഷം ഓഗസ്റ്റിലാണ് ഇന്ത്യന്‍ വനിതാ ടീമിന്റെ താല്‍ക്കാലിക പരിശീലകനായി പവാര്‍ നിയമിക്കപ്പെടുന്നത്. മൂന്നു മാസത്തേക്കായിരുന്നു നിയമനം. സീനിയര്‍ താരങ്ങളുമായി അഭിപ്രായ വ്യത്യാസമുണ്ടണ്ടായതിനെ തുടര്‍ന്ന് തുഷാര്‍ അറോത്തെ പരിശീലകസ്ഥാനം രാജിവച്ച ഒഴിവിലേക്കായിരുന്നു പവാര്‍ എത്തിയത്.