കോഴിക്കോട്: കൊല്ലം ആശ്രാമം മൈതാനിയിലെ കെ.ടി മാനു മുസ്‌ലിയാര്‍ നഗറില്‍ ഡിസംബര്‍ 26, 27, 28, 29 തിയതികളില്‍ നടക്കുന്ന സമസ്ത കേരള ജംഇയ്യത്തുല്‍ മുഅല്ലിമീന്‍ അറുപതാം വാര്‍ഷിക സമാപന സമ്മേളനത്തിന്റെ ഭാഗമായുള്ള സന്ദേശ ജാഥകള്‍ക്ക് ഇന്ന് തുടക്കമാവുമെന്ന് എസ്.കെ.ജെ.എം.സി.സി ജന.സെക്രട്ടറി ഡോ. ബഹാഉദ്ദീന്‍ മുഹമ്മദ് നദ്‌വി വാര്‍ത്താസമ്മേളനത്തില്‍ അറിയിച്ചു. ഡിസംബര്‍ അഞ്ചുവരെ നടത്തുന്ന ഉത്തര,ദക്ഷിണ മേഖലാ സന്ദേശ പ്രചാരണ ജാഥകള്‍ക്കാണ് ഇന്ന് തുടക്കം കുറിക്കുന്നത്. സമസ്ത സെക്രട്ടറി കൊയ്യോട് ഉമര്‍ മുസ്‌ലിയാര്‍ ഉത്തര മേഖലാ ജാഥയ്ക്കും ഡോ. ബഹാഉദ്ദീന്‍ മുഹമ്മദ് നദ്‌വി ദക്ഷിണ മേഖലാ ജാഥയ്ക്കും നേതൃത്വം നല്‍കും.
ഇരു ജാഥാ ക്യാപ്റ്റന്മാരും ഇന്ന് രാവിലെ 8.30ന് പാണക്കാട് വച്ച് സയ്യിദ് ഹൈദരലി ശിഹാബ് തങ്ങളില്‍നിന്നും സയ്യിദ് മുഹമ്മദ് ജിഫ്‌രി മുത്തുക്കോയ തങ്ങളില്‍നിന്നും പതാക ഏറ്റുവാങ്ങും. ചടങ്ങില്‍ സി.കെ.എം സ്വാദിഖ് മുസ്‌ലിയാര്‍, എം.ടി അബ്ദുല്ല മുസ്‌ലിയാര്‍ എന്നിവര്‍ സംബന്ധിക്കും. ഇന്ന് വൈകിട്ട് 6.30ന് മംഗലാപുരം ബന്തറില്‍ നടക്കുന്ന ഉദ്ഘാടന സമ്മേളനം സമസ്ത ജന.സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍ ഉദ്ഘാടനം ചെയ്യുന്നതോടെ ഉത്തര മേഖലാ യാത്രയ്ക്ക് തുടക്കമാകും. തുടര്‍ന്ന് കാസര്‍കോട്, കണ്ണൂര്‍, കോഴിക്കോട്, വയനാട്, നീലഗിരി, മലപ്പുറംഈസ്റ്റ്, പാലക്കാട്, തൃശൂര്‍ ജില്ലകളില്‍ നടക്കുന്ന അറുപതോളം മേഖലാ സമ്മേളനങ്ങളിലെ സ്വീകരണങ്ങള്‍ക്കുശേഷം ഡിസംബര്‍ അഞ്ചിന് ചാവക്കാട് സമാപിക്കും.
30ന് രാവിലെ എട്ടിന് കന്യാകുമാരി തിരുവിതാംകോടുനിന്ന് ദക്ഷിണ മേഖലാ യാത്ര പ്രയാണമാരംഭിക്കും. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്‍, മലപ്പുറംവെസ്റ്റ് ജില്ലകളില്‍ അറുപതോളം മേഖലാ സമ്മേളനങ്ങളിലെ സ്വീകരണങ്ങള്‍ക്ക് ശേഷം പൊതുസമ്മേളനത്തോടെ ചാവക്കാട് സമാപിക്കും. ഇരുജാഥകളിലും സമസ്തയുടെയും കീഴ്ഘടകങ്ങളുടെയും നേതാക്കളും അറിയപ്പെടുന്ന പ്രഭാഷകരുമടങ്ങുന്ന 60 സ്ഥിരാംഗങ്ങളും പ്രത്യേക യൂനിഫോമില്‍ 60 ബൈക്ക് യാത്രികരും അനുഗമിക്കും.
എസ്.കെ.ജെ.എം സംസ്ഥാന പ്രസിഡന്റ് സി.കെ.എം സ്വാദിഖ് മുസ്‌ലിയാരാണ് ഇരുജാഥകളുടെയും രക്ഷാധികാരി. അബ്ദുല്‍ ഹമീദ് ഫൈസി അമ്പലക്കടവ് (വൈസ് ക്യാപ്റ്റന്‍), വാക്കോട് മൊയ്തീന്‍കുട്ടി ഫൈസി, കെ.കെ ഇബ്‌റാഹിം മുസ്‌ലിയാര്‍ (ഡെപ്യൂട്ടി ക്യാപ്റ്റന്‍), കെ.ടി ഹുസൈന്‍കുട്ടി മൗലവി (ഡയരക്ടര്‍), സയ്യിദ് ഹുസൈന്‍ തങ്ങള്‍ കാസര്‍കോട് (അസി.ഡയരക്ടര്‍), അബ്ദുസ്സമദ് മൗലവി മുട്ടം (കോ ഓഡിനേറ്റര്‍), ഹസൈനാര്‍ ഫൈസി ഫറോക്ക്(അസി. കോ ഓഡിനേറ്റര്‍) എന്നിവര്‍ ഉത്തരമേഖലാ ജാഥയ്ക്ക് നേതൃത്വം വഹിക്കും.
അബ്ദുസ്സമദ് പൂക്കോട്ടൂര്‍ (വൈസ് ക്യാപ്റ്റന്‍), എം.എം ഇമ്പിച്ചിക്കോയ മുസ്‌ലിയാര്‍ കമ്പളക്കാട്, മൊയ്തീന്‍ മുസ്‌ലിയാര്‍ പുറങ്ങ് (ഡെപ്യൂട്ടി ക്യാപ്റ്റന്‍), അബ്ദുറഹ്മാന്‍ മുസ്‌ലിയാര്‍ കുടക് (ഡയരക്ടര്‍), വി.എം ഇല്‍യാസ് ഫൈസി (അസി.ഡയരക്ടര്‍), അബ്ദുല്‍ ഖാദിര്‍ അല്‍ ഖാസിമി (കോ ഓഡിനേറ്റര്‍), സലീം എടക്കര(അസി.കോ ഓഡിനേറ്റര്‍) എന്നിവര്‍ ദക്ഷിണ മേഖലയിലും ജാഥയ്ക്ക് നേതൃത്വം നല്‍കും.
വാര്‍ത്താസമ്മേളനത്തില്‍ എസ്.കെ.ജെ.എം.സി.സി സെക്രട്ടറി അബ്ദുറഹ്മാന്‍ മുസ്‌ലിയാര്‍ കുടക്, എം.എ ചേളാരി, പി. ഹസൈനാര്‍ ഫൈസി, മുഹമ്മദലി ഫൈസി മണ്ണാര്‍ക്കാട്, കെ.കെ ഇബ്‌റാഹിം മുസ്‌ലിയാര്‍, മുസ്തഫ മുണ്ടുപാറ എന്നിവരും പങ്കെടുത്തു.