വെസ്റ്റ് ബാങ്ക്: ഫലസ്തീന്‍ യുവാവിനെ ഇസ്‌റാഈല്‍ സൈന്യം വെടിവച്ചുകൊന്നു. അധിനിവിഷ്ട വെസ്റ്റ് ബാങ്കിലെ തുല്‍കരീമില്‍ ഇന്നലെ പുലര്‍ച്ചെ നടത്തിയ റെയ്ഡിലാണ് മുഹമ്മദ് ഹൊസ്സാം അബ്ദുല്‍ ലത്വീഫ് ഹബാലിയെ (22) സൈന്യം വെടിവച്ചുകൊന്നത്.
തലയ്ക്കും കാലിനുമാണ് വെടിവച്ചതെന്നു ഫലസ്തീന്‍ വാര്‍ത്താ ഏജന്‍സിയായ വഫ റിപ്പോര്‍ട്ട് ചെയ്തു. ഫലസ്തീന്‍ വീടുകളില്‍ സൈന്യം റെയ്ഡ് നടത്തുന്നതിനിടെ ഒരുമിച്ചുകൂടിയവര്‍ക്കുനേരെ വെടിയുതിര്‍ക്കുകയായിരുന്നു. എന്നാല്‍, റെയ്ഡ് നടത്തുന്നതിനിടെ കല്ലെറിഞ്ഞെന്നും ഇവരെ പിരിച്ചുവിടാനാണ് വെടിയുതിര്‍ത്തതെന്നും സൈനിക വക്താവ് പറഞ്ഞു. വെടിവയ്പില്‍ മറ്റൊരു ഫലസ്തീനിക്കു പരുക്കേറ്റിട്ടുണ്ട്.
കൊല്ലപ്പെട്ട ലത്വീഫ് ഹബാലിക്ക് മാനസികരോഗമാണെന്നും റിപ്പോര്‍ട്ടുകളുണ്ട്. 24 ഫലസ്തീനികളെ റെയ്ഡിനിടെ അറസ്റ്റ് ചെയ്‌തെന്നു ഫലസ്തീന്‍ സന്നദ്ധ സംഘടന അറിയിച്ചു.