തിരുവനന്തപുരം: നെയ്യാറ്റിന്‍കരയില്‍ നടന്ന തിരുവനന്തപുരം റവന്യൂ ജില്ലാ സ്‌കൂള്‍ കലോത്സവത്തില്‍ അഴിമതി അന്വേഷിക്കണമെന്നാവശ്യപ്പെട്ടും അപ്പീല്‍ അനുവദിച്ചതിലെ അപാകതകള്‍ അനുവദിക്കണമെന്നാവശ്യപ്പെട്ടും വിദ്യാര്‍ഥിനികളുടെ നേതൃത്വത്തില്‍ പെതുവിദ്യാഭ്യാസ ഡയറക്ടറുടെ ഓഫിസിലേക്ക് മാര്‍ച്ച് നടത്തി.
കോട്ടണ്‍ഹില്‍ ഗവ. എച്ച്.എസ്.എസിലെ ഉള്‍പ്പെടെ വിദ്യാര്‍ഥിനികളാണ് ഇന്നലെ പ്രതിഷേധപകടനം നടത്തിയത്. കലോത്സവത്തിലെ വിധിനിര്‍ണയത്തില്‍ നടന്ന വ്യാപക അഴിമതിക്കു പിന്നാലെ അപ്പീലുകള്‍ അനുവദിച്ചതിലും വന്‍കൃത്രിമമാണ് തിരുവനന്തപുരം ഡി.ഡിയുടെ നേതൃത്വത്തില്‍ നടന്നത്. ഡി.ഡി ഓഫിസിലെ ചിലരായിരുന്നു ഇതിനു പിന്നില്‍.
മത്സരാര്‍ഥികളുടെ വീഡിയോ ദൃശ്യങ്ങള്‍ ജഡ്ജസിനെ കാണിക്കാതെ കലോത്സവ മാഫിയയുടെ നിര്‍ദേശാനുസരണം അര്‍ഹരായവരെ അപ്പീലിലും തഴഞ്ഞ് കാര്യങ്ങള്‍ തീര്‍പ്പാക്കിയതിനു പിന്നിലും വന്‍അഴിമതി നടന്നു. സബ്ജില്ലാ കലോത്സവങ്ങളില്‍ നിന്ന് അപ്പീലിലൂടെ എത്തിയവരെ സബ്ജില്ലയിലെ ഒന്നാം സ്ഥാനക്കാര്‍ക്ക് പിന്നിലാക്കാനും ഒരു നൃത്താധ്യാപകന്റെ നേതൃത്വത്തില്‍ ശ്രമമുണ്ടായി.
അപ്പീലിന്റെ പേരില്‍ വന്‍കൊള്ളയാണ് നടന്നത്. 2000 രൂപ നല്‍കി 254 അപ്പീലുകള്‍ വാങ്ങിയതില്‍ 40 ഓളം അപ്പീലുകള്‍ മാത്രമാണ് അനുവദിച്ചത്. നൃത്ത ഇനങ്ങളില്‍ അപ്പീലുകാരുടെ സി.ഡി പോലും കാണാതെയാണ് അപ്പീല്‍ തള്ളിയത്. സി.ഡി കാണേണ്ട ആവശ്യമില്ലെന്നായിരുന്നു ഡി.ഡി ഓഫിസിലെ സീനിയര്‍ സൂപ്രണ്ടിന്റെ മറുപടി. സംസ്ഥാന കലോത്സവം ഒറ്റക്കു നടത്തിയ തനിക്ക് ഇക്കാര്യങ്ങളെക്കുറിച്ച് ശരിയായ ധാരണ ഉണ്ടെന്നായിരുന്നു പരാതിക്കാരോടുള്ള ഇയാളുടെ മറുപടി. സംഭവം വിവാദമാകുന്നത് ഭയന്ന് ഉന്നത ഉദ്യോഗസ്ഥര്‍ പലരും ഇന്നലെ ഓഫിസില്‍ ഉണ്ടായിരുന്നില്ല. ഗ്രൂപ്പ് ഇനങ്ങളില്‍ ഉള്‍പ്പെടെ കോട്ടണ്‍ഹില്‍ സ്‌കൂള്‍ നല്‍കിയ ഏഴ് അപ്പീലുകളും തള്ളിയതില്‍ പ്രതിഷേധിച്ചായിരുന്നു പ്രകടനം നടത്തിയത്്.