റിയാദ്: സഊദി ഭരണാധികാരി സൽമാൻ രാജാവിന്റെ സഹോദരൻ മിത്അബ് ബിൻ അബ്ദുൽ അസീസ് രാജകുമാരൻ അന്തരിച്ചു. 88 വയസ്സായിരുന്നു. അൽ സഊദ് രാജകുടുംബത്തിലെ മുതിർന്ന അംഗമായിരുന്നു. 1958 നും 1961 നും ഇടയിൽ അദ്ദേഹം മക്ക പ്രവിശ്യയുടെ ഗവർണറായിരുന്നു. ശേഷം മറ്റ് ഭരണപരമായ പദവികളും വഹിച്ചു.

       1980 മുതൽ 2009 വരെ സഊദി മുനിസിപ്പൽ, ഗ്രാമകാര്യ മന്ത്രിയായിരുന്നു. സഊദി രാഷ്ട്ര പിതാവ്‌ അബ്ദുൽ അസീസ്‌ രാജാവിന്റെ 17 ആമത്തെ മകനാണു മിത്‌അബ്‌ രാജകുമാരൻ. കാലിഫോർണിയയിൽ പഠനം നടത്തുകയും പൊളിറ്റിക്കൽ സയൻസിൽ ബിരുദം നേടുകയും ചെയ്തിട്ടുണ്ട്‌. ചൊവ്വാഴ്ച ഇഷാ നമസ്കാരത്തിനു ശേഷം മക്കയിലെ 

ഹറം പള്ളിയിൽ വെച്ച്  മയ്യത് നിസ്കാരം നടക്കുമെന്ന് സഊദി പ്രസ് ഏജൻസി റിപോർട്ട് ചെയ്തു.