കാളികാവ്: ഇരുവൃക്കകളും തകരാറിലായി ചികിത്സാസഹായം തേടുന്ന വെന്തോടന്‍പടിയിലെ അനില്‍കുമാര്‍ എന്ന ചുണ്ടുവിന് പള്ളിശ്ശേരി ഗ്രാമിക കലാസംഘത്തിന്റെ കൈതാങ്ങ്. സാനു പള്ളിശ്ശേരി രചിച്ച 'ഒരു ദേശത്തിന്റെ ആത്മകഥ' എന്ന ചരിത്രപുസ്തകമാണ് ചികിത്സക്ക് വഴിയൊരുക്കുന്നത്. ദുബൈയില്‍ ജോലി ചെയ്യുന്ന സാനു നാടിന്റെയും നാട്ടുകാരുടെയും അഭ്യര്‍ഥനമാനിച്ച പ്രവാസ ജീവിതത്തിലെ തിരക്കിനിടയില്‍ പുസ്തകം രചന പൂര്‍ത്തിയാക്കി നാടിന്  സമര്‍പ്പിച്ചു. കഴിഞ്ഞദിവസം പള്ളിശ്ശേരിയില്‍ നടന്ന ചടങ്ങില്‍  ഒരു ദേശത്തിന്റെ ആത്മകഥ പുറത്തിറക്കി. മഹാകവി മോയിന്‍കുട്ടി വൈദ്യര്‍ മാപ്പിളകലാ അക്കാദമി ചെയര്‍മാന്‍ ടി.കെ ഹംസ മണ്ണാര്‍ക്കാട് ഡി.എഫ്.ഒ വി.പി ജയപ്രകാശിന് നല്‍കിയാണ് പുസ്തകത്തിന്റെ പ്രകാശന കര്‍മം നിര്‍വഹിച്ചത്. എം.കെ കമാല്‍ അധ്യക്ഷനായി.