മക്ക: ഈ വർഷം ഉംറ സീസൺ ആരംഭിച്ചത് മുതൽ ഇത് വരെ ഇഷ്യു ചെയ്‌തത്‌ റെക്കോർഡ് ഉംറ വിസ. സീസൺ ആരംഭിച്ച ആഗസ്‌റ്റ് 31 മുതൽ ഡിസംബർ അഞ്ചു വരെയുള്ള കണക്കുകളാണ് സഊദി ഹജ്ജ് ഉംറ മന്ത്രാലയം വെളിപ്പെടുത്തിയത്. ഇക്കാലയളവിൽ 1,647,662 ഉംറ വിസകള്‍ അനുവദിച്ചതായി സഊദി ഹജ്ജ് ഉംറ മന്ത്രാലയം അറിയിച്ചു. ഇതിൽ 1,386,183 പേര്‍ ഉംറ നിര്‍വഹിക്കാന്‍ ഇതിനകം പുണ്യഭൂമിയിലെത്തിക്കഴിഞ്ഞതായും 1,075,738 പേര്‍ ഉംറ കര്‍മങ്ങള്‍ പൂര്‍ത്തിയാക്കി സ്വദേശങ്ങളിലേക്ക് മടങ്ങിയതായും ഹജ്ജ് ഉംറ മന്ത്രാലയം വ്യക്തമാക്കി.

      ഉംറ തീര്ഥാടകരിൽ ഇന്ത്യ മൂന്നാം സ്ഥാനത്താണ്. 210,052 ഉംറ തീർത്ഥാടകരാണ് ഇന്ത്യയിൽ നിന്നും ഉംറ വിസയിൽ ഇതിനകം എത്തിച്ചേർന്നത്. ഒന്നാം സ്ഥാനത്തുള്ള പാകിസ്ഥാനിൽ നിന്നും മൂന്നേമുക്കാൽ ലക്ഷത്തോളം തീർത്ഥാടകരും രണ്ടാം സ്ഥാനത്തുള്ള ഇന്തോനേഷ്യയിൽ നിന്നും മൂന്നര ലക്ഷത്തോളം തീർത്ഥാടകരും ഭൂമിയിലെത്തിയിട്ടുണ്ട്. ഈ സീസണില്‍ ഏറ്റവും കൂടുതല്‍ തീര്‍ത്ഥാടകര്‍ പാകിസ്ഥാനില്‍ നിന്നുള്ളവരാണ്. 373,984 പേര്‍. രണ്ടാം സ്ഥാനത്ത് 347,424 പേരുമായി ഇന്തോനേഷ്യയും മലേഷ്യ, തുര്‍ക്കി, ബംഗ്ലാദേശ്, അള്‍ജീരിയ, യു.എ.ഇ, ഇറാഖ്, ജോര്‍ദാന്‍ എന്നിവയാണ് ആദ്യ പത്തിലെ മറ്റു രാജ്യങ്ങള്‍. 1,328,647 തീര്‍ഥാടകരും സഊദിയിലെത്തിയത് വിമാനമാര്‍ഗമാണ്. 57,525 പേര്‍ കപ്പല്‍ മാര്‍ഗവും 11 പേര്‍ കടല്‍ മാര്‍ഗ്ഗവുമാണ് എത്തിയത്.