ലണ്ടന്‍: പ്രീമിയര്‍ ലീഗില്‍ അപരാജിത കുതിപ്പു നടത്തിയ മാഞ്ചസ്റ്റര്‍ സിറ്റിയെ ചെല്‍സി എതിരില്ലാത്ത രണ്ട് ഗോളുകള്‍ക്ക് പരാജയപ്പെടുത്തി. എന്‍ഗോളോ കാന്റെ, ഡേവിഡ് ലൂയിസ് എന്നിവരാണ് ചെല്‍സിയ്ക്ക് വിജയഗോള്‍ സമ്മാനിച്ചത്. മത്സരത്തിലുടനീളം മികച്ച പ്രകടനം കാഴ്ചവച്ചിട്ടും സിറ്റിക്ക് ചെല്‍സി പ്രതിരോധം തകര്‍ക്കാനായില്ല. തോല്‍വിയോടെ സിറ്റി പട്ടികയില്‍ രണ്ടാം സ്ഥാനത്തേക്ക് പിന്തള്ളപ്പെട്ടു. 42 പോയിന്റുള്ള ലിവര്‍പൂളാണ് ഒന്നാം സ്ഥാനത്ത്. 41 പോയിന്റോടെ സിറ്റി രണ്ടാം സ്ഥാനത്തും 34 പോയിന്റുള്ള ചെല്‍സി നാലാം സ്ഥാനത്തും നിലകൊള്ളുന്നു. 36 പോയിന്റുള്ള ടോട്ടനമാണ് മൂന്നാം സ്ഥാനത്ത്. മറ്റൊരു മത്സരത്തില്‍ ലെസ്റ്റര്‍ സിറ്റിയെ രണ്ട് ഗോളുകള്‍ക്ക് ടോട്ടനം പരാജയപ്പെടുത്തി. ടോട്ടനത്തിന് വേണ്ടി സണ്‍ ഹ്യുങ് മിന്‍ (46) ഡെലി അലി (58) ഗോളുകള്‍ നേടി.