തിരുവനന്തപുരം: വര്‍ഗീയ സംഘര്‍ഷം ലക്ഷ്യമിട്ട് വിദ്വേഷ പ്രചാരണം നടത്തിയതിന് ഈ സര്‍ക്കാര്‍ അധികാരത്തില്‍ വന്നശേഷം 60 കേസുകള്‍ രജിസ്റ്റര്‍ ചെയ്തതായി മുഖ്യമന്ത്രി പിണറായി വിജയന്‍ നിയമസഭയെ അറിയിച്ചു.
സമൂഹമാധ്യമങ്ങളിലൂടെയുള്ള പ്രചാരണത്തിന് 44ഉം ലേഖനങ്ങളുടെ പേരില്‍ രണ്ടും പ്രസംഗങ്ങള്‍ക്ക് നാലും മറ്റ് സംഭവങ്ങളില്‍ പത്തും കേസുകളാണ് രജിസ്റ്റര്‍ ചെയ്തത്. സമൂഹമാധ്യമങ്ങളിലൂടെ വിദ്വേഷ പ്രചാരണം നടത്തുന്നവരെ കണ്ടെത്തുന്നതിന് നിരീക്ഷണം ശക്തമാക്കിയിട്ടുണ്ട്. സേനയിലെ ഉദ്യോഗസ്ഥര്‍ക്ക് സൈബര്‍ സുരക്ഷയെക്കുറിച്ച് ആധുനിക പരിശീലനം നല്‍കിവരുന്നുണ്ട്. പൊലിസിലെ വനിതാ പ്രാതിനിധ്യം വര്‍ധിപ്പിക്കുന്നതിനായി പുതിയ ബറ്റാലിയന്‍ ആരംഭിച്ചിട്ടുണ്ട്. ഇതില്‍ 451 പേര്‍ക്ക് നിയമനം നല്‍കിയതായും മുഖ്യമന്ത്രി അറിയിച്ചു.