വൈത്തിരി: മോഷണശ്രമത്തിനിടെ നാലുപേര്‍ പൊലിസ് പിടിയില്‍. ഇന്നലെ പുലര്‍ച്ചെ രണ്ടോടെ വൈത്തിരി സബ് ഇന്‍സ്‌പെക്ടര്‍ ജയപ്രകാശിന്റെ നേതൃത്വത്തിലുള്ള പൊലിസ് സംഘമാണ് വൈത്തിരി ടൗണില്‍ മോഷണശ്രമം നടത്തുന്നതിനിടയില്‍ അടിവാരം സ്വദേശികളായ നാല് യുവാക്കളെ പിടികൂടിയത്.
പൊലിസ് പട്രോളിങ്ങിനിടെയാണ് ഇവര്‍ പിടിയിലായത്. കൊയിലാണ്ടി, തിക്കോടി ഭാഗങ്ങളിലെ മൊബൈല്‍ ഷോപ്പുകളില്‍ നിന്നും മോഷ്ടിച്ച നിരവധി മൊബൈല്‍ ഫോണുകളും റീചാര്‍ജ് കൂപ്പണുകളും മോഷണത്തിന് ഉപയോഗിക്കുന്ന ആയുധങ്ങളും പൊലിസ് ഇവരില്‍ നിന്ന് പിടിച്ചെടുത്തു.പിടിയിലായവര്‍ നിരവധി മോഷണക്കേസിലെ പ്രതികളാണെന്നാണ് പൊലിസ് നല്‍കുന്ന സൂചന. അടിവാരം സ്വദേശികളായ ലിന്റോ രമേഷ്, കണ്ണപ്പന്‍കുണ്ട് ഷാഹിര്‍, പുതുപ്പാടി മുനീഷ്, അടിവാരം ഷാഹിദ് എന്നിവരാണ് പിടിയിലായത്.
ഇവരെ മറ്റ് കേസുകളുടെ അന്വേഷണത്തിനായി പൊലിസ് കൊണ്ടുപോയി. രാത്രി വൈകി പ്രതികളെ മജിസ്‌ട്രേറ്റ് മുന്‍പാകെ ഹാജരാക്കി. സിവില്‍ പൊലിസ് ഓഫിസര്‍ സജി അഗസ്റ്റിന്‍, ഡ്രൈവര്‍ സുനില്‍കുമാര്‍ എന്നിവരും എസ്.ഐക്കൊപ്പമുണ്ടായിരുന്നു.