നേമം: വഴുതക്കാട് പ്രവര്‍ത്തിച്ചിരുന്ന വാന്‍ വെജിറ്റബിള്‍ എന്ന സ്ഥാപനത്തില്‍ 2008 ഏപ്രില്‍ 30ന് രാത്രിയില്‍ തിരുവനന്തപുരം ആന്റി പവര്‍ തെഫ്റ്റ് സ്‌ക്വാഡ് പരിശോധന നടത്തി കണ്ടു പിടിച്ച കേസിലാണ് വേലുക്കുട്ടിയുടെ മകന്‍ അശോകനെ തിരുവനന്തപുരം പ്രിന്‍സിപ്പല്‍ സെഷന്‍സ് കോടതി ജഡ്ജി കെ.ഹരിപാല്‍ ശിക്ഷിച്ചത്. പ്രതി നടത്തി വരുന്ന കടയില്‍ സ്ഥിരം വൈദ്യുതി മോഷണം നടത്തുന്നുവെന്ന് കാണിച്ച് ഐ.ജിയ്ക്ക് ലഭിച്ച പരാതിയില്‍ നടത്തിയ അന്വേഷണത്തിലാണ് വൈദ്യുതി മോഷണം കണ്ടുപിടിച്ചത്.
അഞ്ചുലക്ഷം രൂപയ്ക്ക് മുകളില്‍ ബോര്‍ഡിന് സാമ്പത്തിക നഷ്ടം തിട്ടപ്പെടുത്തിയ കേസിലാണ് വിധി. ഇലക്ട്രിക് മീറ്ററില്‍ അതിശക്തിയായ കാന്തം ഘടിപ്പിച്ചാണ് വൈദ്യുതി മോഷണം നടത്തിയത്. ഇലക്ട്രിക് മീറ്റര്‍ പരിശോധിച്ച് കോടതിയില്‍ റിപ്പോര്‍ട്ട് സമര്‍പ്പിച്ച ഇലക്ട്രിക് ഇന്‍സ്‌പെക്ടര്‍ ഭദ്രന്‍ കോടതിയില്‍ കൂറുമാറിയിരുന്നു. സാക്ഷി ഭദ്രനെതിരേ പ്രോസിക്യൂഷന്‍ നടപടി സ്വീകരിക്കണമെന്നാവശ്യപ്പെട്ട് പബ്ലിക് പ്രേസിക്യൂട്ടര്‍ സമര്‍പ്പിച്ച ഹര്‍ജിയില്‍ ഭദ്രന്‍ ഓഗസ്റ്റ് 30 ന് കോടതിയില്‍ നേരിട്ട് ഹാജരാകുവാന്‍ ജില്ലാ കോടതി ഉത്തരവിട്ടു.
മ്യൂസിയം പൊലിസ് ചാര്‍ജ് ചെയ്ത കേസില്‍ പ്രോസിക്യൂഷനു വേണ്ടി പബ്ലിക് പ്രോസിക്യൂട്ടര്‍ പള്ളിച്ചല്‍ എസ്.കെ പ്രമോദും അഭിഭാഷകരായ ഡി.ഐ റെക്‌സ്, പ്രബീണ്‍ എസ്.ജെ, ബിബിന്‍ ചന്ദ്ര, അജിത് മോഹന്‍ എന്നിവര്‍ ഹാജരായി. വിവിധ വകുപ്പുകളിലായി മൂന്ന് വര്‍ഷവും മുപ്പതിനായിരം രൂപയുമാണ് വിധിച്ചത്. ശിക്ഷ ഒന്നിച്ച് അനുഭവിച്ചാല്‍ മതിയാകും.